Nokianin’i Atallah Béatrice ny CED sy ny CER

07/03/2013

Manao fitsidiham-paritra any Tolagnaro, renovohitr’Anôsy hatry ny omaly ny filohan’ny Vaomiera mahaleontenan’ny Fifidianana Atallah Béatrice. Nandritra ny fihaonany tamin’ireo solontenan’ny CENIT any an-toerana no nanakianany ny fomba fiasan’ireto farany sy nanomezany toro-marika entitra azy ireo. Hanatrika sy hanome voninahitra ny andro iraisam-pirenena any an-toerana ihany koa ny filohan’ny CENIT. Azo lazaina fa tampoka dia tampika tamin’ireo tompon’nandrikitra isan-tsokajiny any amin’ny Faritr’Anôsy ny fahatongavan’i Atallah Béatrice sy ireo mpiara-miasa taminy izay any Tolagnaro amin’izao fotoana izao.

Araka ny nambarany dia hijery ifotony ny zava-misy taorian’ny nahavakisan’ny biraon’ny CENIT tany an-toerana no isan’ny anton-diany, ankoatry ny fandraisana anjara amin’ny hetsika fanamarihana ny andron’ny vehivavy any an-toerana, amin’ny maha zanak’iny faritra iny ny tenany. Nambarany rahateo fa ny distrikan’ny Tolagnaro no distrika voalohany notsidihiny eto Madagasikara. Ny sekretera jeneralin’ny faritra no nandray azy tao amin’ny Biraon’ny Faritra tamin’ny fahatongavany. Tsy tazana kosa ny lehiben’ny Faritra ary tsy nisy fanambarana ny antony tsy nahatongavany tamin’ny fihaonana tamin’ny filohan’ny CENIT.
Ankoatra ny fitsidihana ara-pomba fanajana ny tao amin’ny fiadidiana ny faritra dia isan’ny nanokanan’ny filohan’ny CENIT fotoana manokana ihany koa ny fijerena ny zavamisy ao amin’ny rantsamangaikan’ny CENIT eny anivon’ny Faritra Anôsy (CER)sy ny eny anivon’ny Distrika (CED) any an-toerana ihany koa. Teo anatrehan’izy ireo no nanambaran’ny filohan’ny CENIT fa mampiahiahy tokoa ny fahavakisan’ny biraon’ny CED sy ny nahaverezana ireo fitaovana tao amin’izany birao izany. Nahoana no tsy nisy afa-tsy ny tranon’ny CENI-T ihany no vaky sy very fitaovana? Hoy ny fanontaniany. Nambarany fa efa misy ny fandraisana andraikitra manoloana izany ary efa nihaona tamin’ireo mpitandron’ny filaminana ny tenany. Anisan’ny nanaitra ity filohan’ny CENIT ihany koa ny tsy fisian’ny filaminana eo anivon’ireo ratsamangaikan’ny CENI-T. Misavoritaka, hoy izy ny birao, tsy mazava ny fipetrak’ireo isan’ny olona nahavita karam-panondrom-pirenena izay miisa 2500 araka ny tatitra azo. Ny C.I.R no tena voatsikera tamin’izany. Nanome baiko ny amin’ny tokony hisian’ny fomba fiasa vaovao ny filohan’ny CENIT. Nararaotiny tamin’io fotoana io ihany koa ny filazana fa misy fitaovana iray kamiao efa eny an-dalana hihazo an’i Tolagnaro amin’izao fotoana izao ka tokony hisy ny fandaminana manokana momba izany. Efa any an-toerana ihany koa ny teratany kongole iray, mpilatsaka an-tsitrapo, hiara-miasa amin’ny CED sy CER amin’ny fanomanana ny fifidianana sy ny lafiny fandaminana ny ho enti-manana.
Mandritra ny fivahiniany any Tolagnaro izay hisy ny fihaonany amin’ireo vehivavy any an-toerana , ho fanentanana azy ireo mba handray anjara mavitrika amin’ny fifidianana rehetra hatao amin’ity taona ity. Hefarana ny faha faharetan’ny fivahinian’ireto delegasiôna avy amin’ny CENI-T any Tolagnaro izao.