Misy mpisoloky ny lavanty

07/03/2013

Na teo aza ireo fepetra maro izay efa noraisin’ny fiadidiana ny ladoany mba hampizotra an-tsakany sy an-davany ny lavantin’ireo entana tsy misy mpaka tao amin’ny dia mbola tsy tery làlana ihany ireo olon-dratsy. Isan’ny mpitranga matetika araka ny hita any an-toerana dia ireo mpisoloky izay maka vola amin’ireo olona mpandray anjara amin’ny lavanty.

Milaza ho “receveur” ao amin’ny ladoany ireo mpisoloky ireo. Milaza ho vadi-tany kosa ny hafa. Hatreto dia olona roa no efa tsikaritry ny fiadidiana ny Ladoany ho nanao izany asa ratsy izany. Ny voalohany dia, izay milaza fa olon’ny fitondrana FAT, ary ny faharoa dia olona avy any Antsirabe. Araka ny fantatra dia efa misy mihintsy ny fitoriana azy ireo eny amin’ny fitsarana amin’izao fotoana izao. Ny loharanom-baovao avy ao anivon’ny Ladoany no nahafantarana fa efa indroa no nahazo entana tamin’ity lavanty ity ilay voalohany. Fantatra anefa fa tsy nalainy akory izany entana izany. Vokatr’izany dia nampidirina tao anatin’ny lisitr’ireo atao hoe “défaillants” ny anarany. Akory anefa ny hagagan’ny maro fa ny faran’ny herinandro teo dia mbola nahazo entana ihany ny tenany. Nolavin’ny mpanao lavanty anefa izany faziany entana izany ka izany no isan’ny nihavian’ny olana. Ilay faharoa kosa, izany hoe ilay avy any Antsirabe dia ny famoriana olona sy manao fampanantenana amin’ireo mpandray anjara amin’ny lavanty amin’ny entana tiany no tena fanaony. Voalaza fa maka vola be mihintsy izy amin’ireo olona manaiky rebirebeny amin’izany.
Tsar any mampatsiahy fa isan’ny fanatsarana nataon’ny ladoany amin’ny fampanjakana ny mangarahana amin’ny fanaovana lavanty ny entana tamin’ity taona ity ny fametrahana ny fiaraha-miasa amin’ny Birao mahaleotena miady amin’ny kolikoly n any Bianco. Teo ihany koa ny famoahana amin’ny alalan’ny tranokalam-pifandraisana ny lisitr’ireo entana atao laaanty. Mbola isan’ny nasiam-panatsarana ihany koa ny momba ny fiarahamiasa amin’ny vaditany.