Manao sakana indray ny dahalo

09/03/2013

Tsy ahitam-bahaolana maharitra hatramin’izao ny asan-jiolahy any amin’iny distrikan’Amboasary atsimo ny. Araka ny vaovao nampitain’ny loharanom-baovao avy any an-toerana dia ny lalam-pirenena faha 13 manpitohy an’i Amboasary atsimo sy Tolagnaro indray izao no anaovan’ny jiolahy ny asa-ratsin’izy ireo. Matetika dia matetika no andrenesana fanafihan-jiolahy amin’izany lalam-pirenena izany, toy izay nitranga tamin’ny alarobia teo. Tsy latsaky ny folo ireo jiolahy manakana izay mandalo amin’izany lalam-pirenena izany.

Raha somary nangingina ny fanafihan-dahalo tany amin’iny distrikan’Amboasary atsimo iny, nandritra ny herinandro vitsivitsy izay, dia mahazo vahana kosa indray tato ho ato ny fanafihana eny amin’ny lalam-pirenena any amin’izany faritra izany ihany. Ny lalam-pirenena faha 13 izay mampitohy an’Amboasary atsimo amin’i Tolagnaro no tena lasibatr’izany fanafihana izany, araka ny loharanom-baovao avy any an-toerana. Ity loharanom-baovao ity no nahafantarana fa vao miala eo ho eo amin’ny 7 km avy eo Amboasary atsimo ho any Tolagnaro no famelezan’ireto jiolahy ireto, izay manao be fiavy manafika ireo izay mandalo amin’izany làlana izany. Ny alarobia teo, ohatra, dia nisy fiara ho any Tolagnaro nosakanan’ireto andian-jiolahy ireto. Soa ihany fa afaka tamin’ny velam-pandrik’izy ireo izany fiara izany. Tsy nisy ny naratra, tsy nisy ihany koa ny aina nafoy, saingy nitondra takaitra ny fiara satria nahitana Diana bala maromaro. Fantatra ihany koa, mbola araka ny loharanom-baovao ihany fa maro ihany koa ireo mpandeha amin’ny alalan’ny bisikkleta no voaroban’ireto jiolahy ireto. Lasan’izy ireo amin’izany ny bisikleta sy ny zavatra mety ho lafo vidy entin’izy ireny.
Araka ny fanamarihan’ny loharanom-baovao hafa dia saika amin’ny fotoana fandraisambolan’ireo mpiasan’ny “colons” any Amboasary no tena famelezan’ireo jiolahy ireo. Izany hoe tsy hita eo isan’andro isan’andro akory izy ireo.
Tapaka ny jiro sy ny rano
Efa hatramin’ny fandalovan’ny rivo-doza Haruna ka mandrak’izao dia mbola tsy misy herin’aratra ao antampon-tananan’Amboasary. Tapaka torak’izany ihany koa ny famatsian-drano ao amin’izany tanana izany. Rano amin’ny fatsakana arak’izany no ampiasain’ny mponina amin’ny andavan’andro. Mitaraina vokatr’izany ny vahoaka ao antampon-tananan’Amnboasary atsimo ary manaitra ny sain’ny tompon’andraikitra ambony ao anivon’ny orinasa Jirama mba hijery akaiky ny vahaolana manoloana ny fahatapan’ny jiro sy rano any amin’izy ireo.