Nanome rà tao amin’ny HJRA

09/03/2013

Isan’ireo nanamarika tamin’ny fomba manokana ny andron’ny vehivavy, omaly ireo vehivevy avy ao amin’ny ankolafy Ravalomanana izay notarihan’ny filoha lefitry ny Filankevitra ambonin’ny tetezamita Razafimanatsoa Hanitra sy ny Cst Naika Eliane, ary ny Ct Rasoanoromalala Horace. Fanomezan-drà maimaim-poana no hetsika nataon’izy ireo ary tao amin’ny hopitaly HJRA no nanatanterahana izany. Araka ny fanazavana nataon’i Razafimanantsoa Hanitra dia nanome rà ny Ankolafy Ravalomanana satria sarobidy izany rà izany amin’ny olombelona. “Izay mamone ra dia manome aina”, hoy ny fanazavany. Ny tianay avoitra, hoy ihany izy, dia maha zava-dehibe ny fanomezana aina amin’ny maha reny anay, ary izany reny izany dia iateheran’ny firenena. Ankoatr’izay dia isan’ny antony nanaovan’izy ireo ity hetsika ity ihany koa ny fahitana fa tsy ampy ny filàn’ny hopitaly HJRA rà amin’izao fotoana izao.

Nararaotin’ity vehivavy mpanao politika avy amin’ny ankolafy Ravalomanana ity ihany koa ny fotoana omaly, izay andron’ny vehivevy, nilazana ny heviny mikasika ny vehivavy sy ny politika eto Madagasikara. Nambarany fa efa sahy miseho eo amin’ny sehatra politika ny vehivavy Malagasy amin’izao fotoana izao. Na izany na tsy izany anefa dia mbola mila fanentanana ihany koa izy ireo mba handray anjara bebe kokoa amin’ny sehatry ny politika satria raha nandray andraikitra ny vehivevy dia tsy hitarozaka toy izao ny toe-draharaha eto Madagasikara, hoy ny fanazavan’i Maître Hanitra. Nosinganiny manokana tamin’izany ny vehivevy any amin’ny tontolo ambanivohitra izay matetika dia mila tairina na mila tarihina vao mandray andraikitra. Nefa raha mandray andraikitra daholo ny vehivavy dia mandroso ny firenena, hoy ihany Razafimanantsoa Hanitra.
Mikasika ny fodian’i Lalao Ravaloamnana dia nambarany fa tsy nisy ny fivoriana niarahana tamin’ny Praiminsitra. Amin’izao fotoana izao dia efa tsy miteny ary tsy mintsangana Bebe Razay, koa ny faniriany amin’ny andro kely sisa iainany dia ny hihaonany amin’ny zanany. Ny fanakanana an-dRamatoa Lalao Ravalomanana ve hitondra fitoniana? Hoy ny fanontaniana napetrany.