Nisongadina ny fitakiana ny fampodiana an’i Lalao

09/03/2013

Afaka nandray anjara tamin’ny hetsika fanamarihana ny andron’ny vehivevy avokoa ireo fikambanam-behivavy tao Toamasina omaly. Nisongadina kosa ny fihetsika nasehon’ny vehivevy avy amin’ny ankolafy Ravalomanana tany an-toerana. Ireto farany izay nitondra sora-baventy nitaky ny fampodiana an-tanindrazana ny vadin’ny filoha teo aloha. Teo imason’ny minisitry ny Atitany izay nanome voninahitran ny lanonana no nanaovan’izy ireo izany hetsika izany. Tsy diso anjara tamin’ny fanamarihana ny andro iraisam-pirenen’ny vehivevy ny tao antampon-tananan’ny Toamasina izay nanatanterahana hetsika manokana manandrify izany omaly.

Fikambanam-behivavy maro tany an-toerana no nandray anjara tamin’izany hetsika izany ka isan’ireny ny vehivevy avy amin’ny ankolafy Ravalomanana izay namarana ny filaharambe araka ny nandaharan’ny tompon’nandrikitra izany. Sora-baventy maneho ny fitakiana ny fanajana ny zon’ny vehivavy amin’ny alalan’ny fampodiana an-tanindrazana ny vadin’ny filoha teo aloha izay tokony hitsabo ny reniny marary mafy, no nentin’ireto vehivevy avy amin’ny ankolafy Ravalomanana ireto. Ankoatr’izay dia isan’ny mbola nasongadin’izy ireo tamin’ny sora-baventy hafa ihany koa ny fitakiany ny fampodiana an-tanindrazana ny filoha teo aloha Ravalomanana Marc sy ny fianankaviany. “Mitaky ny fampodiana araka ny tondrozotra sy amin’ny maha-vadina ‘filoham-pirenena’ azy an-dRtoa Lalao Ravalomanana ary ny fanajana ny zo fototry ny vehivavy amin’ny maha-reny azy; nefa hanaovana antsonjay sy lalao politika maloto”. Izay no isan’ny hita tamin’izany sora-baventy izany. Teo imason’ny minisitry ny Atitany Florent Rakotoarisoa izay tonga tao Toamasina, sy ny lehiben’ny faritra Atsinanana Mahavimbina Alain, ary ireo manamboninahitry ny tafika no nanaovan’ireo vehivevy avy amin’ny ankolafy Ravalomanana ireo fitakiana ireo
Ankoatra izay, dia nisongadina tamin’ny hamaroany koa ny Fimami tarihan’ny CT Dr Benessy Harison Sebastien izay nanalava ny filaharana. Nizara telo kosa nandritra ny filarahana ny Tgv, izay nahitana ny Tgv Naharimamy Irma izay namiratra tamin’ny tsy fahatongavany teo amin’ny araben’ny fahaleovan-tena, ny Tgv GAR tarihan’Atoa Mahavimbina Alain, ary ny Tgv Avahizo an-dRtoa Fideline. Isany nandray anjara ihany koa ireo vehivavy MDM, ny vehivavy avy amin’ny antoko Maintso, ny AMP ary ny Vital fampandrosoana…tsy nandray anjara mihintsy kosa ny Arema sy ny MTS.