“Atsaharo ny fisamborana”

11/03/2013

Mitaky ny fampitsaharana ny fisamborana ataon’ny mpitandro filaminana any Mandritsara ireo zanaky ny Faritra Sofia. Mangataka ny hamoahana tsy misy fepetra ireo izay nosamborina taorian’ny hetsika nataon’ireo tanora tany an-toerana ihany koa izy ireo. Marihina fa araka ny nambaran’ireto zanak’i Sofia ireto dia mahatratra 24 hatramin’izao no nosamborin’ny mpitandro filaminana tamin’ity raharaha Mandritsara ity. Tamin’ny raharaha nahavoaroiroy ny mpanao politika Alain Tehandrazanarivelo no nisehoan’ny zanaky ny Faritra Sofia farany.

Nipoitra indray izy ireo amin’izao fotoana izao noho ilay raharaha nitranga taorian’ny namonoan’ny jiolahy ilay relijiozy vavy Marie Emmanuelle. Arak’izany dia nanao fanambarana izay mitaky ny fametrahana fitoniana amin’izao ankatoky ny fanatanterahana ny fifidianana eto Madagasikara izao ny zanaky ny Faritra Sofia izay ivondronana fikambanana maro dia maro avy any amin’iny faritra iny. Isan’izany ny fikambanan’ny Sojabe avy any an-toerana , ny fikambanana Sofia Miray, ny fikambanana FFT, ny fikambanana CAS, ny fikambanana distrika 7 faritra Sofia, ny ACSM, ary ny Soeres izay ivondronan’ny mpanatra avy any amin’iny faritra iny izay mandranto fianarana eny amin’ny anjerimanontolo eto Antananarivo. Tamin’ny alalan’ny fanambarana no nitondran’izy ireo ny fitakiany manoloana ny fivoaran’ny toe-draharaha any an-toerana, indrindra ny fisamborana izay ataon’nympitandro filaminana any Mandritsara tao anatin’ity raharaha ity.
Niantso ny fitondram-panjakana mba hampitsahatra avy hatrany ny fisamborana ny zanak’i Sofia. Mitaky ny hamoahana ireo rehetra izay nosamborina ihany koa izy ireo. Nambaran’ny fanambarana fa mahatratra 24 ireo tanoran’i Mandritsara izay nosamborin’ny mpitandro filaminana noho ny fihetsiketsehana nataon’izy ireo. Ankoatr’izany dia mitaky ny fampiharana ny lalàna amin’ireo nahafaty olona rehetra, taloha sy nandritra ny savorovoro ihany koa ny zanak’i Sofia.
Marihina fa araka ny nambaran’ny filohan’ny fikambanana Sofia Miray, Beantrifina Patrice dia manameloka tanteraka ny fihetsika feno habibiana ka nahafaty ny relijiozy Marie Emmanuelle izay nahavita be tokoa tamin’ny fiaraha-monina tao Mandritsara sy ny manodidina izy ireo.