“Feno fitaka ny fitadiavam-bahaolana natao”

11/03/2013

Araka ny fanambarana efa nataony dia nanatontosa fotoam-pivavahana tetsy amin’ny kianjan’Antsahamanitra ny Sabotsy teo ireo mpitondra fivavahana avy amin’ny HMF (Hetsiky ny mpitondra fivavahana). Nandritra ity fotoam-pivavahana ity no nitondran’izy ireo ny heviny sy nanentanany ny vahoaka manoloana ny zava-misy eto amin’ny firenena amin’izao fotoana izao. Nambaran’izy ireo tamin’ny alalan’izany fanambarana izany fa natao ihany ny hangina manolona izay lazaina hoe famoahana ny firenena anaty krizy, kanjo nahatsiaro ho diso eo anatrehan’Andriamanitra sy ny mpiray tanindrazana raha mangina manoloana izao hantsana mangitsokitsoka nilatsahan’ny firenena ary mbola kasaina hitondrana azy izao.

Nasongadin’ny HMF ihany koa fa feno fitaka sy lainga ny fitadiavam-bahaolana rehetra natao sy mbola izorana amin’izao fotoana izao. Niantso ny vahoaka Malagasy tsy ho sondriana ary tsy hanaiky ho fitaihana ny avy ao amin’ny HMF. Nambaran’izy ireo ihany koa fa ny fikambanana amin’ny ratsy dia manimba ny fitondratena tsara.
Namoaka “topimaso”
Ankoatr’izay dia tsy nisalasala ihany koa ny HMF nilaza fa amin’ny maha mpitondra fivavahana azy ireo dia sahiny ny milaza fa mbola tsy hivaha aorian’ny fifidianana ny krizy ary hisy krizy vaovao ho mafy noho izao, raha mbola feno tsy fahamarinana no hamahana ny krizy sy hikarakarana ny fifidianana. Nasian’izy ireo resaka ihany koa ny mikasika ny fitsangananan’ny FFM (Filankevitra fampihavanana Malagasy) izay toherin’izy ireo tanteraka.Nambarany fa tsy hitondra fampihavanana eto amin’ny firenena ity rafitra ity satria olona miandany amina antoko politika sy amin’ny fitondrana tetezamita ny ankamaroan’ireo tafidiatra ao amin’izany andrim-panjakanan’ny tetezamita izany.
Marihina fa nandritra ity hetsika ara-pivavahana tamin’ny asabotsy ity no namoahan’ny HMF ny “Topimaso” izay itadiavana ny fahamarinana hanairana ny sain’ny rehetra hahatsiaro fa efa nivoaka ny làlan’ny fahamarinana ity famoahana ny firenena anaty fahasahiranana ity. Hatolotra ny ireo masoivoho vahiny miasa sy monina eto Madagasikara, ary ireo mpiara-miombon’antoka amin’ny firenena izany tahirin-kevitra mirakitra ny zava-nisy teto amin’ny firenena hatramin’ny nisian’ny fanonganam-anjakana tamin’ny taona 2009