Handroso vahaolana vaovao sy maharitra

12/03/2013

Niantefa tany amin’ny vahoaka Malagasy tsy an-kanavaka ny antso nataon’ireo avy amin’ny Fiarahamonim-pirenena sy ireo olom-pirenena tsotra izay namaky bantsilana ireo izay heverin’izy ireo fa tsy azo ekena intsony amin’ny toe-draharaha eto amin’ny firenena amin’izao fotoana izao. Miantso ny vahoaka Malagasy, arak’izany, izy ireo handray anjara amin’ny hetsika izay hatao ao amin’ny kianjan’Antsahamanitra amin’ny asabotsy izao. Hetsika izay mikendry ny hahatongavana amin’ny fitsanganan’ny rafitra hifehy ny ahitana vahaolana maharitra amin’izao krizy politika manjo ny firenena izao.

Tamin’ny alalan’ny valan-dresaka ho an’ny mpanao gazety izay nokarakarain’izy ireo omaly teny Faravohitra no nanambaran’ireo avy amin’ny Vondrona Firaisamonim-pirenena ny heveriny fa lesoka goavana amin’ny famahana ny krizy ireo atrehan’ny firenena Malagasy amin’izao fotoana izao. Isan’izany ny « jadona sy ny ramatahora amin’ny fahafahan’ny tsirairay, indrindra fa ireo mankarary ny haino aman-jery noho ny sivana ». Isan’ny lesoka goavana ihany koa araka ny nambaran’izy ireo ny « fahantrana manjo ny mpiasa ny orinasa sy ny fikambanana samihafa (fram, vondrona sendikaly, ny Patronat, ary ny mpivarotra sy ireo very asa). Mbola lesoka hitan’izy ireo ihany koa ny fahaverezan’ny « hasim-panjakana izay misafotofoto sy tsy ara-drariny », ary ny tsy fisian’ny « antoka marina tokoa » manloana ny firosoana amin’ny fifidianana izay andrandrain’ny be sy ny maro fa hitondra filaminana sy fitoniana.
Ankoatr’ireo dia mbola isan’ny nasongadin’ireo vondrona firaisamonim-pirenena ihany koa ny fahitan’izy ireo ny zava-misy nentin’izao fitondrana izao. Isan’izany ny « fanaovana takalon’aina ny fiainam-bahoaka sy ny orinasa, ny fanaovana sorona ny tantsaha , ny mpiasa ary ny taranaka, ny fanaovana tetezamita lava reny sy tanteli afa-drakotra ny harem-pirenena, ny fangoronan-karena tsy ara-drariny sy ny tsy maty manonta, ny tsy fanajana ny teny nomena ary ny ramatahora samihafa ».
Fametrahana rafitra
Tanjon’ireto avy amin’ny vondrona Firaisamonim-pirenena ireto araka ny fanambarana izay nataony omaly dia ny hisian’ny rafitra hifehy ny fomba ahitana vahaolana mmaharitra manoloana ny krizy izay iainan’ny Malagasy amin’izao fotoana izao. Tanjona izay mitaky fivondronan’ny firaisamonim-pirenena sy ny olom-pirenena mandray andraikitra, manana fahaisa-manao, mahay manaja ny fifampifehezana, ary mahay miray hina. Ny fihaonana amin’ny vahoaka amin’ny sabotsy izao eny amin’ny kianjan’Antsahamanitra no dingana voalohany hatrehan’izy ireo hametrahany izany rafitra izany. Fihaonana izay iantsoan’izy ireo ny vahoaka tsy an-kanavaka.
Marihina fa niainga avy amin’ny fahatsapana ny loza mitatao eto amin’ny firenena manoloana ny tsy fisian’ny rafitra itantanana ny firenena aorian’ny fianianan’ny Filohan’ny Repoblika ity hetsika nataon’ny Fovondronana Firaisamonim-pirenena ity. Satria, araka ny voalaza ao amin’ny andininy faha 29 n’ny tondrozotra fa tapitra amiaraka amin’ny fianianan’ny filoha vaovao hitondra ny tany sy ny fanjakana ny asan’ireo andrim-panjakan’ny tetezamita. Tsy maintsy katsahana dien’izao arak’izany, hoy ireo avy amin’ity vondrona ity ny hisian’ny rafitra mba ialana amin’izany fahabangana goavana izany.