Maty tsikelikely ... !

13/03/2013

Namoy namana iray indray ireo mpianatra Malagasy mandranto fianarana any amin’ny firenena Sinoa. Nodimandry omaly i Bruno Herivelo Rakotomalala, iray amin’ireo mpianatra mandranto fianarana tany amin’ny oniversiten’i Wuhan. Araka ny loharanom-baovao dia noho ny fijanonan’ny fony tampoka no nahatonga ny fahafatesany.

Tsy sambany, tato anatin’ny herinandro vitsivitsy, no nisy mpianatra Malagasy maty tany Chine. Hatreto dia tondroin’ny maro ho isan’ny antony mahatonga izao fahafatesana izao ny fasahiranana sedrain’ireo mpianatra Malagasy any Chine noho ny tsy fanomezan’ny fitondrana azy ireo ny vatsim-pianarana afahany miatrika ny fiainany an-davan’andro sy ny fianarany.Fantatra fa tsy afa-nitsabo tena noho izany ity mpianatra nindaosin’ny fahafatesana ity.
Handranto fianarana no nialàna teto an-tanindrazana. Indrisy anefa fa fahafatesana no nanjo an’i Bruno Herivelo Rakotomalala, mpianatra Malagasy tany Chine. Araka ny fantatra dia nijanona tampoka ny fon’ity tovolahy ity ka izay no nahatonga ny fahafatesany. Ny fanambarana avy amin’ireo namany mianatra any Chine kosa dia nilaza fa “maty narary fo no sady voan’ny haretin’ny voa i Bob”, satria izany no anarana fiantso azy. Voalazan’ny fanambarana ihany koa fa “tokony hitsabo tena izy fa noho ny tsy fisiana dia tsy afa-nanoatra fa miandry ny vola avy amin’ny fanjakana Malagasy nefa tsy mety tonga ny vola”. Mazava loatra fa nanaitra ny maro, indrindra ireo Ray aman-dreny manan-janaka mianatra any amin’ity firenena ity izao tranga izao, izay tsy sambany, araka ny loharanom-baovao. Fara-fahakeliny dia ity no mpianatra Malagasy faharoa nindaosin’ny fahafatesana tany Chine tato anatin’ny herinandro vitsivitsy. Manampy trotraka izany ny fahafantarana fa misedra olana goavana dia goavana ireo mpianatra Malagasy any amin’ity firenena noho ny tsy nanomezan’ny fitondrana tetezamita azy ireo ny vatsim-pianarany efa volana maromaro izao. Misy mihintsy aza ny loharanom-baovao izay nilaza fa misy ifandraisany amin’izay fasahiranana goavana iainan’ny mpianatra Malagasy any Chine izany ny fahafatesan’ity mpianatra ity. Marihina fa hatreto dia mbola tsy nanome vahaolana maharitra mikasika ny fandohavana ny vatsim-pianaran’ny mpianatra any ivelany ny fitondrana tetezamita. Nisy ihany ny vahaolana natolotry ny filohan’ny tetezamita saingy tsy nifanaraka tamin’ny nandrasan’ny maro izany, ary mbola tsy hita taratra ihany koa ny fanatanterahana azy hatramin’izao. Isan’izany ny fikasana hampody ireo mpianatra namerin-taona. Eo ihany koa ny filazana fa hanome vatsim-pianarana roa volana. Mbola tsy voaray anefa izany vatsim-pianarana izany mandrak’izao.
Atso an-tany efitra
Efa maro ny antso vonjy nataon’ireo mpianatra sy ny Ray aman-drenin’izy ireo mikasika ity raharaha ity. Efa nisy mihintsy aza ny fandraisan’andraikitra tamin’ny fakana mpisolovava izay sady mpiaro ny zon’olombelona tamin’ny alalan’ny fanaovana antso avo tamin’ny fitondrana tetezamita mba hijerena haingana ny vahaolana mikasika ny fiainan’ireo mpianatra Malagasy any Chine ireo. Araka ny voalaza tamin’ireny antso vonjy ireny dia efa misy mihintsy ireo mpianatra no tsy misakafo afa-tsy rano satria tsy manam-bola intsony ary efa bokan’ny trosa ihany koa. Ao ihany koa ireo efa tsy afa-mianatra na koa efa tsy manana ny taratasy afahany mijanona any Chine noho ny fepetra. Toy ny antso teny amin’ny tany efitra hatrany anefa izany rehetra izany ary tsy nisy afa-tsy fanambarana no nataon’ny fitondrana tetezamita manoloana izany.