Manina azy Antananarivo

14/03/2013

Mirongatra izay tsy izy ny fanafihana mitam-piadiana mahery vaika. Toa manana tahirim-bala mihitsy ireo jiolahy raha ny zava-niseho farany teo no dinihana. Raha ny tokony ho izy mantsy dia miezaka ny tsy hampiasa ny bala any aminy ireo olon-dratsy, izany hoe tsy mandanindany foana ny balany raha tsy efa mihatra amin’ny ainy ny zava-mitranga. Tamin’ity indray mitoraka ity kosa anefa narefodrefotr’ireo jiolahy ny kalachnikov, feno diam-bala ny trano teny Anjanahary ary nanao tifitra vary raraka teny Besarety. Izany hoe tsy manana olana amin’ny famatsiana bala ireto andian-jiolahy ireto. Tsy mbola hita soritra mazava anefa ny fandraisana andraikitry ny CIRGN nisolo toerana ny jeneraly Ravalomanana Richard. Toa manina ity komandin’ny zandarinamariam-pirenena ity ny vahoaka ankehitriny.

Amin’ny trangan-javatra tahaka izao indrindra tokoa mantsy no tena nahafantarana ity manamboninahitra ambony ity. Nomeny anjara toerana goavana ny serasera izay nanampy azy teo amin’ny fanatanterahany ny andraikiny. Nandray fitenenana nampitony ny vahoaka hatrany koa ny jeneraly Ravalomanana Richard ary nanentana ny olona hitoroka izay rehetra mampiahiahy eny anivon’ny fiaraha-monina eny. Kalitao nanan’ny CIRGN teo aloha izay fisehoany matetika izay (tsy hidirana ny resaka politika) ary tsy tamin’ny alalan’ny hainoamanjery fotsiny ihany fa niditra an-tsehatra mihitsy.
Ankehitriny, toa very fanahy mbola velona ny vahoaka manoloana ny firongatry ny asan-jiolahy goavana. Tsy tazana intsony ilay jeneraly mivantambatam-piteny, mazàna aza maha tohina mihitsy ny mandre azy. Nomena izao karazana anaram-bositra rehetra izao (bomb man, jeneraly baomba, profesora Ravalomanana, sns) ny jeneraly Ravalomanana tamin’ireny fotoana naha CIRGN Faritanin’Antananarivo azy ireny. Ny zavatra azo tsapain-tanana kosa aloha, na inona fanankianana natao taminy, dia toa nanana toky ho azy izany ny olona raha vao miseho ny jeneraly Ravalomanana Richard. Mifanohitra tanteraka amin’izany ny zava-misy amin’izao fotoana. Tebiteby sy fitaintainana no iainan’ny isan-tokantrano. Banga teo amin’ny fiainam-piaraha-monina izay serasera nitondra fampitoniana kanefa koa mety nankadilo sofina ny hafa, fanaon’ity manamboninahitra ambony ity izay. Niantefan’ny fanankianan’ny Foloalindahy sy ny Pôlisim-pirenena ity CIRGN Antananarivo ity tamin’izany fotoana; miara-manaiky angamba izy ireo ankehitriny fa sahirana tanteraka miatrika ny vavam-bahoaka noho izao firongatry ny fanafihana mitam-piadiana mahery vaika izao.