Mamaly ny SEG ny ben’ny tanan’Ambatondrazaka

14/03/2013

Nisy akony lehibe tao amin’ny tananan’Ambatondrazaka, hatry ny omaly, ny fanambaràna nataon’ny Sekreteram-panjakana miadidy ny Zandarmariam-pirenena, ny Jeneraly Randrianazary, indrindra tamin’ny filazana fa nisakana ny ny fandraisan’ny Faritra andraikitra manoloana ny fisian’ireo vahiny mpividy safira monina tsy ara-dàlana ao amin’izany tanana izany ny tompon’andraikitry ny fiadidiana ny tanana izany. Nambaran’ny ben’ny tanana fa mbola tsy nandà, na oviana na oviana, ny fanampahan-kevitry ny fitondrana foibe sy ny fanampahankevitry ny fiadidiana ny faritra ny tenany. Etsy an-danin’izany, manomboka mifanantona amin’ny ben’ny tanana ny vahoaka any an-toerana izay naneho ny fahavononan’izy ireo hisakana izay antsonjay mety hatao amin’ity olom-boafidy it,y taorian’iny fanambaran’ny SEG iny.

Mafana dia mafana ny fanehoan-kevitra ao Ambatondrazaka, hatramin’ny nisian’ny fanambarana nataon’ny Sekreteram-panjakana miadidy ny Zandarmariam-pirenena, afak’omaly, indrindra tamin’ny filazan’ny sasany fa mety hiafara amin’ny fanaovana antsonjay amin’ny ben’ny tanana, toy ny fisamborana na ny fanenjehana azy ny raharaha mahakasika ireo vahiny mpividy safira miorim-pinenana tsy ara-dalàna ao amin’izany tanana izany. Araka ny valin-kafatra avy amin’ny ben’ny tanàna, Andriamanirison Jacques Nirina Nampoizina, dia tsy mitombina velively ny filazana fa nitsivalana tamin’ny fandraisan’andrikitra nataon’ny fiadidiana ny faritra Alaotra Mangoro ny tenany. Nambarany fa nandray ny andraikiny hatrany teo amin’ny fitandroana ny filaminana sy ny fanajàna ny tany tan-dalàna ny tenany. “Tsy mankasitraka velively ny zavatra tsy ara-dalàna aho”, araka ny fanamarihany, ary “vonona ny handray ny andraikitro raha misy ny fanapahan-kevitra hiarahan’ny tompon’andraikitra rehetra mianga avy any amin’ny ministera mandalo amin’ny faritra sy ny distrika ary mipaka any amin’ny kaominina”. Tsy ny ben’ny tanàna samirery hoy ihany ny fanambarany, no tompon’andraikitra amin’ny fampiharana ny lalàna, fa eo ihany koa ny andraikitry ny mpitandro ny filaminana sy ny faritra ary ny distrika. Ankoatr’izay dia notsindriany fa tsy mbola nandà ny fanapahan-kevitry ny fitondrana foibe ny tenany tamin’ny fampiharana ny fepetra mahakasika ny resaka fitrandrahana tsy ara-dalàna any amin’ny kaominina Didy. Farany dia nohamafisiny fa nitandro hatrany ny maha tany tandalàna an’Ambatondrazaka ny tenany hatramin’ny nanombohany ny fitantanana ny tanàna ka hatramin’izao vanim-potoana ny tetezamita izao. Maneho hatrany ny fahavononana amin’ny fametrahana ny ara-dalàna ao amin’ny kaominina izay tantanany ny maire Andriamanirison Jacques Nirina Nampoizina.
Marihina fa tsy ny ben’ny tanana izay nahatsiaro ho voakasika mivantana tamin’ny fanambaran’ny jeneraly Randrianazary no taitra tamin’ity raharaha ity fa maro amin’ireo mponina tany an-toerana ihany koa no efa manomana hetsika manoloana izany. Efa misy mihintsy ny mifamorivory, indrindra ireo vatan-dehilahy ao Ambatondrazaka raha vao nahare iny fanambarana iny. Tsy vitsy tamin’izy ireo no efa nilaza fa vonona ny hijoro hiaro ny ben’ny tanana raha sanatria ka misy ny antsonjay sy ny fanenjehana atao azy amin’ity raharaha ity. Ho an’ireto farany dia fanilihana andraikitra taorian’ny tsy fahombiazan’ny sarisarina hetsika izay natao tany Didy izao ataon’ny mpitandro filaminana izao. Misy tamin’izy ireo ihany koa ny naneho ny ahiahiny ny amin’ny mety ho fanafenan-javatra an’izao fanendrikendrehana ny ben’ny tanana izao. Otrik’afo ho an’ny tananan’Ambatondrazaka arak’izany io raharaha io raha tsy ahitana vahaolana malaky dia malaky.