Hanome ny anjarany ny Japoney

14/03/2013

Androany no hatao Sonia ny fifaanarahana hanomezan’ny fanjakana Japoney ny anjarany amin’ny kitapom-bola ho fampandehanana ny raharaham-pifidianana eto Madagasikara araka ny efa nampanantenainy. Etsy an-danin’izany, nanambara ny filohan’ny CENIT fa efa tsy misy intsony ny sakana mety tsy ahatanteraka ny fifidianana araka ny tetiandro efa nofaritana niaraka tamin’ny fianankaviambe iraisam-pirenena.

Tsy nandà ny amin’ny mety ho fisian’ny fikasan-dratsy hisomparana ny fampizorana araka ny tokony ho izy ny fifidianana eto amintsika ny filoh’ny CENIT, Béatrice Atallah, raha nanontanian’ny mpanao gazety ny momba izany ny tenany. Nambarany kosa anefa tetsy an-danin’izany fa efa mandray ny fepetra rehetra hisoroana izany ny rafitra izay tantanany. Tafiditra amin’izany ny fanontana lisim-pifidianana atao dika mitovy. Ankoatr’izay dia nitondra fanazavana mikasika ny fitandroana ny filaminana amin’ny ankapobeny amin’ny fampizorana ny fifidianana ihany koa ny tenany. Nambarany fa anjaran’ny fitondram-panjakana manontolo no miandrikitra izany, indrindra ny fampiasana ny mpitandro filaminana amin’ireo hetsika sy asa rehetra ataon’ny CENIT. Tsy mitombina arak’izany ny fangatahana famatsiam-bola amin’ny CENIT ho amin’ny fitandroana ny filaminana amin’ny fotoam-pifidianana.
Ankoatr’izay dia fantatra ihany koa izao fa amin’ity androany ity no hatao Sonia ny fifanarahana eo amin’ny CENIT sy ny masoivoho Japoney amin’ny hanomezan’ity farany ny anjarany amin’ny teti-bola hampandehanana ny raharaham-pifidianana eto Madagasikara. Mitentina 1 100 000 dolara amerikana ny vola homen’ny Jeponey amin’izany. Isan’ny hampiasana izany vola izany araka ny fantatra, ny fanofanana, ny fanamafisana ny fahaiza-manaon’ireo mpikarakara ny fifidianana, ny fanentanana ny mpifidy ary ny fanampiana ara-pitaovana amin’ny fikarakarana ny fifidianana. Hanatrika izany fifanaovan-tsonia izany ny solontena maharitry ny PNUD eto amintsika, sy ny solontena avy amin’ny governemanta ary ireo mpiara-miombon’antoka amin’ny CENIT.