Nandresy ny mpiasan'ny banky BFV-SG

15/03/2013

Azo lazaina fa nandresy ireo mpiasa mitokona tao amin’ny Banky BFV, raha ny vokatry ny fitsarana ny raharaha ifanolanan’izy ireo amin’ny mpampiasa azy ireo no jerena. Araka ny fantatra dia nodidian’ny fitsarana hanondrotra ny karaman’ny mpiasa, mifanandrify amin’ny fitakian’ireto farany ny Banky BFV SG. Nodidian’ny fitsarana hiverina hiasa manomboka androany kosa ny mpiasa, tetsy an-kilan’izany.

Vita hetreo ny fitokonan’ny mpiasan’ny BFVSG manerana ny Nosy. Hiverina amin’ny laoniny ihany koa ny asan’ity banky ity manomboka androany. Ny didim-pitsarana izay nivoaka omaly, taorian’ny fandinihan’ny fitsarana ny fifanolanana nisy teo amin’ny mpiasa sy ny tompon’andrikitra ambony tao amin’ny Banky BFV SG no nahafantarana izany. Araka ity didim-pitsarana ity dia nekena ny hampiakarana 13% ny karaman’ireo mpiasa kilasiana ho “employés” ao amin’ity Banky ity? Nakarina 9% kosa ny karaman’ny mpiasa voakilasy ho “Cadres” ary 11% ny fisondrotan’ny karaman’ny mpiasa voakilasy ho “Gradés”. Isan’ny fepetra noraisin’ny fitsarana ihany koa ny fanovana ny tombontsoa sasantsasany homena ireo mpiasa ao amin’ity Banky ity. Arak’izany dia nofohanana ny tahan’ny PPO (Prêt au personnel ordinaire), raha 4% izany teo aloha. Tsy misy afa-tsy 2% kosa ny PPI raha 2,5% izany teo aloha.
Raha nanontaniana ny hevitr’izy ireo manoloana ity vokam-pitsarana ity ireo mpiasa izay mbola nitokona nandritra ny andron’ny omaly dia nanambara fa mety amin’izy ireo izany. Vonona ny hiverina hiasa arak’izany izy ireo, hoy ny nambaran’ny solon-tenan’izy ireo, ary mankato ity fanampahan-kevitry ny fitsarana ity.
Tsiahivina fa efa herinandro maromaro izay no nitokona ny mpiasan’ny banky BFV manerana ny Nosy. Ny fitakiana ny fampakarana ny karaman’izy ireo sy ny fanatsarana ireo tombontsoa ara-tsosialy samihafa tokony ho azon’izy ireo no anton’izany fitokonana izany izay niafara tamin’ny fanelanelanan’ny fitsarana.