Asa sarotra no miandry an’i Lalao Ravalomanana

15/03/2013

Araka ny nambaran’i Lalao Ravalomanana nandritra ny resaka nifanaovany tamin’ireo mpanao gazety nitafa taminy teny Faravohitra dia isan’ny asa miandry azy ny fananganana indray ny orin’asa TIKO amin’ny maha orinasam-pianankaviana azy. Tsy asa mora anefa no izany, raha tsy hilaza afa-tsy ny fanjavonan’ireo fitaovana saro-bidy, sisa tsy potika nandritra ireny hetsi-bahoaka notarihan’ny filohan’ny tetezamita ireny isika, kanefa tsy hita popoka mandrak’izao. Hanao izay ho afany tsy afahan’i Lalao Ravalomanana mijery akaiky ny orinasa TIKO arak’izay ireo rehetra voakasiky ny fanjavonan’ireny fitaovana ireny.

Efa-taona lasa izay no nanapotehana ny orin’asa TIKO. Efa-taona aty aoriana vao mihevitra ny hanangana azy indray ny tompony, amin’ny alalan’ny vadin’ny Filoha teo aloha Lalao Ravalomanana. Betsaka ny zava-nisy sy ny zava-nitranga teo anelanelan’izay efa-taona izay. Ankoatry ny fandrobana sy ny fandorana ireo trano sy ireo vokatry ny orin’asa TIKO tamin’ny alatsinainy mainty, izay nisian’ny hetsika notarihan’ny ben’ny tananan’Antananarivo tamin’izany fotoana izany, dia tsy isalasalana ny milaza fa nanampy trotraka tamin’ny fanapotehana ity orinasa ity ny fangalarana ireo fitaovana sarobidy tao aminy. Lasibatr’izany halatra izany ireo fiara vaventy maro dia maro izay fitaterana ireo vakatry ny orinasa TIKO. Tsy vitsy tokoa ny nahatsikaritra fa tsy ireo fiaraben’ny orinasa TIKO manontolo akory no may tamin’iny andron’ny alatsinainy mainty iny. Nankaiza avokoa ary ny maro tamin’ireny fiara ireny. Ankoatry ny fiara dia fantatra ihany koa fa betsaka ireo fitaovana lafo vidy izay nampiasain’ny orin’asa TIKO no tsy hita popoka amin’izao fotoana izao. Mazava loatra fa tsy lasa rivotra avokoa akory ireny fa nisy dia nisy ny tompon’antoka tamin’ny fanjavonany. Voalohany amin’izany ny fitondram-panjakana izay tsy nametraka fiarovana azo antoka an’ity orin’asa ity taorian’ny filefasan-dRavalomanana tany ivelany. Misy mihintsy aza ny milaza fa ninian’ny mpitondra natao izany mba hanapotehana tanteraka an-dRavalomanana sy ny fianankaviany. Porofon’izany, ankoatry ny tsy fisian’ny fiarovana izany orin’asa izany araka ny tokony ho izy dia tsy mbola nanokatra fanadihadiana mahakasika ny fahapotehana na koa ny fahaverezan’ireo fitaovana samihafa tao amin’izany orinasa izany hatramin’izao ny fitondrana tetezamita. Iaraha-mahalala anefa fa nisy dia nisy izany fahaverezana sy fahapotehana izany. Azo kilasiana ho mitovy lenta amin’ny firaisana tsikombakomba amin’ny ratsy ny tsy fanokafana fanadihadiana momba ireny raharaha ireny.
Tsara anefa ny manamarika fa matoa tsy sahy manokatra izany fanadihadiana izany ny fitondrana dia tsy manandrify ny tombontsoany izany. Ny mifanohitra amin’izany aza no mety hitranga satria mety hisy amin’ireo tompon’andrikitra ambony ao aminy no ho voatohitohina raha misy ny fanadihadiana ny fahaverezan’ireo fitaovan’ny TIKO izay nanjavona nandritra ity tetezamita ity.
Tsy mahagaga ary raha sarotiny amin’ny fijanonan’ny vadin’ny filoha teo aloha eto Madagasikara ny maro amin’ireo mpitondra amin’izao fotoana izao. Tsy mahagaga ihany koa raha nametraka fepetra maro dia maro amin’ny fipetrahan’I Lalao Ravalomanana eto an-tanindrazana izy ireo. Mbola tsy mahagaga ihany koa raha hitaky ny fandroahana an’ity vadin’ny Filoha teo aloha ity hiverina any Afrika atsimo izy ireo atsy ho atsy, indrindra rehefa hita taratra fa tena hiroso amin’ny fanarenana ny TIKO tokoa ity renim-pianankaviana ity. Tsara ny mampatsiahy fa isan’ireo fepetra amin’ny fametrahana ny fitoniana eto amin’ny firenena ny fanonerana ireo izay rava fananana tamin’ireny hetsika ireny, ka isan’izany mazava loatra ny fianankaviana Ravalomanana izay isan’ireo tena voa mafy indrindra. Ho sarotra ho an’ny fitondrana tetezamita anefa ny hanaiky izany. Tsy ho resahina intsony ankoatr’izany rehetra izany ny mety ho fiarovana ny tombontsoan’ireo orin’asa sasantsasany mpanohana ny fitondralm-panjakana izay mety ho very tombontsoa raha toa ka tafaverina soamatsara ny orinasa Tiko.
Izany rehetra izany no afahana milaza fa ho sarotra ho an’i lalao Ravalomanana tokoa ny hahazo hipetraka ela eto Madagasikara. Ho sarotra aminy ihany koa ny hanangana indray ny orin’asa TIKO. Raha tsy hoe, manao fanambarana ampahibemaso ny tenany fa tsy hanenjika n’iza tamin’ireo izay nandroba ny fananany.