Niala ireo mpandraharaha

15/03/2013

Tsy handray anjara amin’ny fikarakarana ny fifidianana, ary tsy hanana kandida amin’ny fifidianana ny filohan’ny Antenimieran’ny Varotra sy ny Indostria any Toamasina ireo solontenan’ny mpandraharaha ao anatin’ny “Comité ad hoc”. Kianin’izy ireo ny fitongilanana sy ny tsy fanarahan-dàlana misy amin’ny fanatanterahana ny fifidianana ao amin’ity rafitra ity. Tsy hahasakana ny fampizorana ny fifidianana anefa izany satria efa nanamafy ny amin’ny tsy maintsy handehanan’izany ny ministeran’ny Varotra.

Hanan-kery sa tsia ny fifidianana izay hatao amin’ny sabotsy 16 marsa izao araka ny didim-pitondrana noraisin’ny minisitera ny Varotra? Io no fanontaniana apetraky ny maro manoloana ny savorovoro manodidina ity raharaha ity, izay miha-mafy hatrany arakaraka ny maha akaiky ny daty tokony hanatanterahana izany fifidianana izany. Isan’ny manamafy izany ahiahy izany ny fametraham-pialàn’ireo solontenan’ny mpandraharaha ao anatin’ny komity mpitantana vonjimaika ny CCI T (Chambre de commerce et de l’industrie de Toamasina), na ny “Comité ad hoc”. Araka ny fantatra dia nametram-pialàna tamin’ny 8 marsa lasa teo ireto solontenan’ny mpandraharaha tao amin’ny “comité ad hoc” ireto noho ny fahitan’izy ireo fa betsaka ny tsy fanarahan-dàlana, indrindra ny fitongilanana ataon’ny filohan’izany rafitra vonjimaika izany, izay tsy iza fa i Mbola Joseph Rajaonah. Araka ny fantatra dia mpikambana valo tamin’ireo mpikambana 18 notendrena ireto nametra-pialana ireo izay nahitana ny solontena avy amin’ny Geptoa sy ny Tsiry ary ny Jci sy ny Gepat. Tsy misy afa-tsy ireo silontena folo dia ny solon-tenam-panjakana ahitana ny avy amin’ny fiadidiana ny tetezamita sy ny avy amin’ny primatiora ary ny avy amin’ny minisiteran’ny Varotra sy ny avy amin’ny minisiteran’ny Vola sy teti-bola ary ny avy amin’ny praminisitra lefitra misahana ny Toe-karena sy ny indostria no tsy napetra-pialàna. Isan’ireo tsy niala ihany koa ny solontenan’ny Faritra atsinanana sy ny solontenan’ny avy eo anivon’ny seranan-tsambo ahitana ny Spat – Mictsl – Smmc. Tsiahivina fa ny didim-pitondrana laharana 1102/2013/MC tamin’ny 23 janoary 2013 izay navoakan’ny minisiteran’ny Varotra no nametraka ity “Comité ad hoc” ity.

Tsy fanarahan-dàlana

“Tsy te-hiray tsikombakomba amin’ny tsy fanajana ny lalana sy ny tsy fanarahan-dalana ataon’ny filohan’ny ‘comite ad-hoc’ miaraka amin’ireo solon-tenam-panjakana sasany ao anatiny, ka aleonay miala dien’izao”. Izay no nambaran’izy ireo fa antony nanaovan’izy ireo izao fametram-pialanana izao. “Tsy hanakana ny asa ataon’izy ireo amin’ny fanaovana amboletra ny fifidianana hitranga ny sabotsy izao anefa izahay, fa manohitra izany araka ny lalana kosa ary hitondra ny raharaha eo anivon’ny fitsarana mahefa”, hoy hatrany ireo namarana ny fanazavan’izy ireo. Mbola tantara mitohy arak’izany ity raharaha fifidianana any amin’ny CCI Toamasina ity. Tsara anefa ny manamarika fa araka ny fanambarana nvoakan’ny ministeran’ny Varotra tsy tsy hita mandrak’izao izay antony lehibe tokony hanemorana na koa hanafohanana ny fanatanterahana ny fifidianana amin’ny asabotsy izao. Hiroso arak’izany ny fifidianana na dia fantatra aza fa mety hisy ny fanakianana izany.