Mikarakara fihofanana ny UNICEF

15/03/2013

Nirotsaka an-tsehatra amin’ny fiarovana ny zon’ny ankizy any amin’ny faritra Antsinanana ny UNICEF amin’izao fotoana izao. Mikarakara fanofanana ho an’ireo mpisehatra rehetra amin’ny fampanajana ny fiarovana ny zon’ny ankizy, ahitana ny mpitandro ny filaminana sy ireo fikambanana mpiaro ny ankizy ary ireo fiaramonim-pirenena mpiara-miasa amin’ny Unicef ity fikambanana ity.

Nambaran’i Anita Ingabiré tompon’andrikitry ny fiarovana ny zon’ny zaza sy ny ankizy eo anivon’ny Unicef ary mpahay lalana ihany koa fa “tsikaritra loatra ny tsy fanajana ny zon’ny ankizy noho ny krizy politika nihatra mivantana tamin’ny krizy sosialy teto Madagasikara, tahaka ny eto Toamasina. Tsy afaka hijery fotsiny izany isika miaraka izay nametrahana ny tamban-jotra manokana mihintsy, fa tsy maintsy ho fohanana izany satria ny tarataka mihintsy no tandimon-doza ankehitriny”.
Ny fanolanana, ny famporisihana ny ankizy ho “mpampanofa tena”, ny fampiasana azy ireo, ary ny firongatry ny trano fandihizana, ny “cyber-café”, ny jiromena, ary ny fikasihan-tanana samy hafa no tena mateti-mitranga amin’izao fotoana izao, hany ka betsaka ireo zaza sy ankizy miala fianarana sy tsy mianatra intsony indrindra ireo amin’ny kilasy CEG sy ny Lycee. Nomarihan’i Mahavimbina Alain lehiben’ny Faritra Atsinanana izay notsidihan’ireto iraka manokan’ny Unicef sy ny minisiteran’ny Mponina ireto, fa “ny ray aman-drenin’ireo zaza sy ny ankizy sy ireo fianakaviany akaiky ary ny fiaraha-monina misy azy ireo mihintsy, no mahatonga ny tsy fanajana ny zon’izy ireo. Misy ny lalana masazy ireo tsy manara-dalana, ka takiana amin’ny mpitandro ny filaminana sy ny fitsarana ny ho fampiharana azy”.
Fantatra ihany araka ny fanazavana azo fa amin’ireo “mpampanofa tena” miisa 30.000 ankehitriny ao Toamasina izay nitombo be ny krizy, dia mahatratra 60%-ny dia zazavavy sy ankizivavy latsaky ny 18 taona avokoa, raha manodidina ny 10 hatramin’ny 24 taona ny 80%-n’izy ireo ao anatin’ny fikambanana manokana ho mpiaro azy ireo amin’ny herisetran’ny lehilahy.