Nosamborina ny lehiben'ny orinasa Ho-Hup

16/03/2013

Tsy nanaitra ny mpanara-baovao firy loatra ny filazan’ny Ho-Hup fa nosamborin’ny mpitandro filaminana ary notànana etsy amin’ny borigadin’ny zandarimaria Betongolo ilay teratany Maleziana misolo tena ny orinasa eto Madagasikara. Efa nampoizina io trangan-javatra io taorian’ny fikasàn’ny vadintany hampihatra didim-pitsarana tetsy amin’ny Madarail Soarano iny.

Nosamborin’ny mpitandro filaminana tany anaty taxi-brousse, raha iny ndeha hiakatra aty Antananarivo avy naka ny entany tany Moramanga iny, ny teratany Maleziana iray tomponandraikitra ao amin’ny orinasa Ho-Hup, ny alakamisy 14 marsa 2013. Nambaran’ireo mpiara-miasa taminy fa voatery nifindra eto an-drenivohitra ity Maleziana ity noho ny fandrahonana nahazo azy tetsy amin’ny Madarail ny sabotsy 9 marsa 2013. Tsy nisy nampandre ny fisian’izao fisamborana izao mihitsy koa, hoy hatrany ny mpiara-miasa ao amin’ny Ho-Hup fa izy ireo no nitady izay misy ity teratany maleziana ity. Maty rahateo koa ny findainy ka tsy nisy fomba nahafahana niresaka taminy, hoy hatrany ireto mpiasa ireto. Mihorohoro tanteraka ny mpiasa eo anatrehan’izany rehetra izany. Vao omaly mangiran-dratsy koa mantsy dia efa nihatrana teo anoloan’ny biraon’ny Ho-Hup etsy Anosimpatrana ny fiaran’ny mpitandro filaminana ary nikasa hiditra tao amin’ny toeram-piasana, hoy hatrany ireto mpiasa ireto.
Tan-dalàna
Mazava ny voalazan’ny didim-pitsarana nahatonga ny vadintany haka ireo fitaovan’ny Ho-Hup tetsy amin’ny Madarail Soarano, araka izao manaraka izao: « …ordonne la restitution des engins et matériels à la société Ho Hup Construction par la société MMER: condamne la société MMER à payer à la requérante la somme de 30.000.000 Ariary. Rejette la demande de la société MMER ». Izany hoe nodidian’ny Fitsarana haverina amin’ny orinasa Ho-Hup ireo fitaovana any amin’ny orinasa MMER, miampy fandoavana onitra 30 tapitrisa ariary ary nolavin’ny Fitsarana ny fangatahan’ny orinasa MMER, didy nivoaka tamin’ny 16 aogositra 2012 n°141-C. Etsy an-danin’izany, efa manana ny antsoina hoe « certificat de non recours » nivoaka ny faha-10 desambra 2012 ny orinasa Ho-Hup. Izany hoe didy raikitra no teny am-pelatanan’ny vadintany nanao ny asany tetsy amin’ny Madarail Soarano ny sabotsy 9 marsa 2013. Tsy azo nampiharina anefa izany didim-pitsarana izany satria niditra an-tsehatra ny mpitondra HAT. Ny ministry ny Fitsarana mihitsy, araka ny nambaran’ny tomponandraikitry ny orinasa Ho-Hup no niantso an-tariby ny vadintany nampiato ny famiharana ilay didy. Mbola tany tan-dalàna ve ity Madagasikara ity; aiza eo anatrehan’izao fitsabatsabahan’ny fahefana mpanatanteraka amin’ny raharaham-pitsarana izao ny SMM?
Tsy ireo “engins” sy kamiao “benne” etsy Soarano fotsiny ihany no fitaovan’ny Ho-Hup. Misy hatrany Foulpointe sy faritra maro manerana ny Nosy ary rah any fantatra aza dia hoe misy amin’ireo fitaovan’ny orinasa ireo nisy nidotndra any Didy, toerana misy fitrandrahana safira vao avy nanaovan’ny sekreteram-panjakana miadidy ny zandarimaria, ny jeneraly Randrianazary, valan-dresaka an-gazety farany teo. Tsy manana hasiny sy ny lanjany intsony ve izany ny didim-pitsarana izay navoaka amin’ny anaran’ny vahoaka Malagasy, raha ity raharaha Ho-Hup ity no dinihana?