Hiditra amin'ny andiany faharoa

16/03/2013

Nanomboka ny 4 febroary ka hatramin’ny 6 marsa teo nahatratra 1.734.900.000 ny vola azon’ny ladoany ny lavanty andiany voalohany, natao tamin’ireo entana tsy nisy mpaka tao aminy. Hahazo 30% avy amin’io vola io ny Mictsl sy Smmc ary Ccit. 20% kosa ho an’ny ladoany, ny 10% ho an’ny ‘compagnie de navigations’ sy ‘ayant droit’. Lamba tonta, sira, siramamy, vary, fitaovam-pitsaboana, kojakojam-piarakodia, sakafo isan-karazany, menaka ary kojakoja samy hafa, no maro tamin’ireto entana natao lavanty ireto izay efa nisy ny taona 2009 no tsy nisy mpaka teo anivon’ny seranan-tsambon’i Toamasina. An-jatony ny kaontenera vita lavanty tamin’izao ampahany voalohany izao. Manodidina ny 60 kosa ireo fiara .

Hanomboka tsy ho ela kosa ny ampahany faharoa amin’ny lavanty, satria entana manodidina ny 300 mahery no mbola henjehina hatao lavanty araka ny politikan’ny tale jeneralin’ny ladoany, noho ny fahamaroan’ireo entana tsy alain’ny tompony ka manempotra ny seranan-tsambo. « Maro loatra ireo mpibizina, ireo mpigafy, ireo mpiady nefa tsy maka ny entany (défaillants) ary ireo mpisoloky, manaratsy ny lavanty izay nametrahana fomba fiasa vaovao. Henjanina ny fanaraha-maso sy ny sazy ary ny fanenjehana ireo olona ireo manomboka izao, tany misy lalana eto ary tsy natao hanaovana bizina sy fisolokiana ny lavanty ataon’ny ladoany », izay no nambaran’ireo teo anivon’ny ladoany ao Toamasina, izay namafisin’ny vadintany Me Rasamimaka Mahefalahy mpanao ny lavanty ihany koa.
Antony nametrahana ny fandoavana ny « hofana » iray tapitrisa ariary ho an’ireo mpiady lavanty, izay haverina amin’ny tompony aoriana ny fandoavana ny 14% ho an’ny vadintany sy ny fandoavana ny vidin’ny entana. Ankoatra izay, dia aseho sy aranty manerana ny biraon’ny ladoany sy ny eny anivon’ny seranan-tsambo hitrangan’ny lavanty hatrany ny anaran’ireo olona ireo sy ny sariny raha misy, mba hahalan’ny rehetra azy ireo hisian’ny fitandremana ho an’ny mpiady sy hahafay ireo tsy mpanara-dalana ary hanatsarana ny lavanty atao.