Nahazo be indrindra ny GEL

18/03/2013

Tontosa ny sabotsy lasa teo ny fifidianana ireo mpikambana maharitra ao amin’ny Antenimieran’ny Varotra sy ny Indostria any Toamasina n any CCIT. Nizotra tao anatin’ny filaminana tanteraka ny fifidianana, raha araka ny loharanom-baobao avy any an-toerana. Nahazo toerana be indrindra eo an’ivon’izany antenimiera izany, raha araka ny vokam-pifidianana, ny Vondron’ny mpandraharaha mpanondrana litchis n any GEL ( Groupement des exportateurs de Litchis) izay notarihan’ny filohany, Rafidimanana Narson. Ity farany arak’izany no ho lasa filohan’ny CCI Toamasina. Ny andro mialoha ny fifidianana anefa dia efa nisy ny ampahan’olona izay nanao hetsika manohitra ny fampandehanana ny fifidianana atao amboletra.

Toerana 19 amin’ireo 25 ao amin’ny Antenimieran’ny Varotra sy ny Indostria any Toamasina no lasan’ny GEL, raha ny vokatry ny fifidianana izay natao tamin’ny sabotsy teo no jerena. Samy nahazo toerana 3 kosa ny ORTT (Office regional du tourisme Toamasina) sy ny SE Ba TP (Sociétés et entreprises des bâtiments et travaux publics). Marihina fa nizara ho antokony telo ny Vondron’ny mpandraharaha momba ny litchis na ny GEL tamin’ity fifidianana ity. Nisy no natolotra tamin’ny alalan’ny « GEL Commerce » izay nahazo toerana miisa 12 be izao. Nisy kosa ny nirotsaka tamin’ny anaran’ny “GEL Service” izay nahazo toerana miisa 5. Ny ampahany fahatelo dia nirotsaka ho fidina tamin’ny anaran’ny “GEL enterprise”. Nahazo toerana miisa 2 kosa ity ampahany farany ity.
Birao fandatsaham-bato niisa teo: Toamasina I sy Vatomandry ary Mahanoro, no nanaovana ny fifidianana. Tao Toamasina I avokoa ireo mpitarika ny vondrona telo, dia Rafidimanana Narson (GEL) sy Narove Mamy (ORTT) ary Ndalana Thomas (SEBaT), no nanefa ny adidiny avy. Niisa 169 ny mpifidy izay mintsinjara isaky ny kolejy, 87 kolejy ny varotra , 44 ny servisy, ary 38 ny indostria. ka toerana 25 no hifampizarana, ka miisa 12 ny varotra – 08 ny servisy – ary 05 ny indostria. Niisa 143 ireo tonga nifidy, izay nanome toerana be indrindra ny GEL. Na tsy mbola vokatra ofisialy no navoakan’ny “comite ad’hoc”, dia efa azo antoka ny haha-filoha vaovao amin’ny an-dRafidimanana Narson mpitarika ny vondrona GEL; izay efa nilaza sahady ny ampahan’ny fandaharan’asany. “Ny tanjona dia ny fampandrosoana ny Antenimieran’ny varotra, ny fametrahana azy amin’ny tena toerana mendrika ny mpandraharaha, ny maha-mpanelanelana ny fanjakana azy sy ny mpandraharaha ary mpiaro ireo tombontsoan’ny mpandraharaha amin’ny asa fihariany”, hoy ny nambarany taorian’ny fivoahan’ny vokam-pifidianana mbola tsy ôfisialy. Ny talen’ny kabinetran’ny minisiteran’ny Varotra izay tonga tao Toamasina nanara-maso ny fizotry ny fifidianana, dia nanamarika fa fara-fahatarany dia ny talata izao no tsy maintsy havoahan’ny “comite ad’hoc” ny vokatra ofisialy. Nambarany ihany koa fa ny zoma izao dia hivory voalohany ireo mambra 25 vaovao izay hifidy izay ho filohany ary handinika ny lalana vaovao hifampifehezan’izy ireo, ary ny hasolo ny tale jeneralin’ny CCI Toamasina ihany koa.

Hetsika fanoherana

Ny loharanom-baovao izay nanaraka hatramin’ny voalohany ka hatramin’ny farany ny fizotran’ny fifidianana tany an-toerana no nahafantarana fa nizotra tao anatin’ny filaminana tanteraka izany fifidianana izany. Tonga maro ihany koa ireo mpifidy izay nanatanteraka ny adidiny tamin’izany fifidianana izany.
Tsara ny mampatsiahy fa nisy hatrany ny fanakianana ny fanatanterahana ity fifidianana ity avy amin’ireo vondrona sy mpikambana sasany ao amin’ny Antenimeranan’ny Varotra sy ny Indostria any Toamasina. Nisy mihintsy aza ireo vondrona izay nisintaka ary tsy nandray anjara tamin’ity fifidianana ity. Ireto farany izany nilaza fa maro dia maro ny tsy fanarahan-dàlana tamin’ny fikarakarana ny fifidianana. Fantatra ihany koa an-koatr’izany ny fisian’ny fitoriana teny amin’ny fitsarana nataon’ireo izay tsy mankasitraka ity fifidianana ity. Fitoriana izay noheverin’izy ireo fa tokony hanakana aloha ny fampandehanana ny fifidianana mandram-pahitana ny marina. Tsy izany anefa no nitranga fa niezaka nampandeha ny fifidianana hatrany ny ministeran’ny Varotra izay namoaka fanampahan-kevitra manandrify izany.
Ny zoma nialohan’ny fifidianana, dia nisy andian’olona nitondra sora-baventy teo anoloan’ny lapan’ny Faritra Atsinanana izay nilaza ny tsy faneken’izy ireo ny fanaovana ny fifidianana atao amboletra. Efa nikasa ny hiazo ny biraon’ny CCIT koa ireto andian’olona ireto, saingy efa nasiana zandary niaro ny birao tao Ampasimazava. Voatonontonona tamin’izao raharaha izao ny tale jeneralin’ny CCIT. Raha nanontaniana anefa ity farany dia nilaza fa “tsy sambany mahazo ahy ny toy izao, satria ireo hetsika rehetra teo anivon’ny CCIT dia tsy maintsy nahenoako ny anarako ho mpitarika avokoa na tsy misy idirako aza ny raharaha. Efa nampanantsoin’ny polisy ekonomika mikasika izany ny tenako ary nolazaiko fa tsy misy idirako ity raharaha ity” hoy izy.