Mitaky ny hamitana ny fifidianana

18/03/2013

Sambany no nanatontosa hetsika tao antampon-tananan’i Toamasina ny antoko ZAMA (Zanak’i Madagasikara). Fambolen-kazo teny amoron-dranomasina manoloana ny hopitaly be no nataon’izany antoko izany. Hetsika izay niarahany nanatontosa tamin’ny kaominina Toamasina, ny Arian Tourism, ary ny Grene Toamasina. Nandritra izany hetsika izany no nitondran’ity antoko ity ny heviny manoloana ny raharaham-pirenena eto amintsika amin’izao fotoana izao, indrindra ny ho fandraisan’izy ireo anjara amin’ny famahana ny krizy eto Madagasikara

., fa “miaro ny fanajana ny tontolo iainana izahay, nefa tsy midika fa tsy manao politika.
“Tsy ho tratra ny tanjona tianay hapetraka raha tsy manana olona mpanapaka eo amin’ny fitondrana izahay, ka nifasidy ny handray anjara amin’izay fifidianana rehetra any aoriana izahay. Ny ZA.MA rahateo nanao sonia ny tondrozotra saingy tsy niditra ao anaty fitondrana tsy voafidim-bahoaka. Aminay ZA.MA koa dia tsy hivaha izao krizy ireo raha tsy fifidianana ara-demokratika ihany, noho izany takianay ny hanatontosana ny fifidianana rehetra”, hoy ny nambaran’ny Sekretera Jeneralin’ny antoko ZAMA, Rakotozanakaja Toniniaina.

Marihina fa voanio miisa 70 sy atafana 30 no novolen’izy ireo izay notronin’ireo tanora mpikambana an-jatony. “Nisafidy ny hamboly hazo izahay amin’ny maha-‘ecolo-democrate progressiste’ anay. Loza mitatao ho antsika ny loza hateraky ny fiovan’ny toetr’andro, noho ny ataontsika ihany”, hoy ny mpandrindra nasionalin’ny ZA.MA, Ralambosolo Solofoniaina. Aorian’ny fambolen-kazo tao Toamasina, dia hanao toy izany ao amin’ny hopitalin-jazakely Antananarivo sy amin’ireo kaominina roa any Fianarantsoa ihany koa izy ireo.
Raha araka ny tantarany, dia “Association des Natifs de Madagascar” tany Frantsa, Canada, Etazonia ary Suisse no nanombohany ny taona 1996. Mbola asa soa fotsiny no tena nataony tamin’izany. Noho ny krizy ny taona 2009 dia nivadika ho antoko ZA.MA, izay mbola manohy ny asa sosialy ihany saingy namafisina koa ny resaka politika amin’ny maha-antoko “centre gauche” azy. Dr Razafindratsimba Alain Jules no filohany ary efa misy ny antoko avokoa ny faritra 22 manerana ny nosy.