Mivaona amin’ny maha izy azy

18/03/2013

Tsy hita taratra hatreto, ny fiatrehan’ny Filankevitra Fampihavanana Malagasy ny andraikitra tena nofaritan’ny Tondrozotra hiantsorohany. Raha ny zava-misy hatramin’izao andro vitsivitsy nitsanganan’ity andrim-panjakana ity tokoa no jerene dia toa mifantoka betsaka any amin’ny famontsoran-keloka ny tena iompanan’ny asany fa tsy amin’ny fampihavanana, izay notondroin’ny Tondrozotra fa tokony himasoany.

Hoy indrindra ny andininy faha 25 ao amin’ny tondrozotra raha namaritra ny maha izy azy ity andrim-panjakan’ny tetezamita ity : « Hisy fomba fampihavanam-pirenena, tarihin’ny andrim-panjakana iray eto amin’ny Firenena antsoina hoe ny Filankevitry ny Fampihavanana Malagasy (Filankevitry ny Fampihavanana Malagasy) sy hamorain’ny fiombonambe Iraisam-pirenena, tokony hatomboka mba hitsaboana sy hanombohana ny fanasitranana ny ratra isam-batan’olona sy iombonana tamin’ny lasa ary hametrahana ny fototra iorenana tsara amin’ny ho avin’i Madagasikara ». Arak’izany dia ny fampihavanam-pirenena no andraikitra voalohany tokony himasoan’ity andrim-panjakana ity fa tsy ny famotsoran-keloka. Tsy midika anefa izany fa tsy tafiditra ao anatin’ny asa tokony hataony amin’ny fampihavanana ny famontsoran-keloka. Satria iaraha-mahalala fa ny famontsoran-keloha homena ny an-daniny sy ny an-kilany amin’ireo raharaha politika nisy teto amin’ny firenena dia tsy midika velively fa hiverina hihavana izy ireo. Voakasik’izany manokana ny Filoha teo aloha Ravalomanana sy ny filohan’ny Tetezamita Rajoelina. Tsy midika mihintsy fa hihavana izy ireo raha toa ka homena famontsoran-keloka isan’isany avy. Hatreto anefa dia tsy mbola niresaka ny amin’ny fomba hitondran’izy ireo ny fampihavanana an-dRavalomanana sy Rajoelina ny FFM. Ny hany resahany dia ny fanomezana famontsoran-keloka.
Ankoatr’izay dia tsy vitsy ihany koa ny fanakianana manandrify izay resaka famontsoran-keloka izay amin’izao fotoana izao. Isan’ny naneho ny heviny ny mpahay lalana sady efa minisitra sy mpitana ny tombokasem-panjakana, Imbiky Anaclet izay nilaza fa mifanohitra amin’ny tokony ho izy ny fanomezana famontsoran-keloha izay atao amin’izao fotoana izao. Araka ny fanazavan’ity mpahay làlana ity dia famontsoran-keloka politika no tokony hatao, noho izany ny FFM no tokony hanana fahefana feno amin’izany, araka ny voalazan’ny tondrozotra raahateo. Izany hoe tsy tokony hanao afa-tsy ny fanadihadiana ara-teknika ihany ny « Comité ad hoc » avy amin’ny Fitsarana Tampony, raha araka ny nambaran’ny mpahay làlana Imbiky Anaclet. Iaraha-mahalala, hoy izy fa tsy nahazo fihofanana ary tsy manana traik’efa momba ny fanomezana famotsoran-keloka ara-politika ny mpitsara Malagasy. Tokony tsy afamadika arak’izany ny asan’ny FFM sy ny “Comité ad hoc” ao amin’ny Fitsarana Tampony, araka ny hevitr’i Imbiky Anaclet.