Nodoran’ny miaramila ny tananan’ny foko Zafindrav'ala

29/10/2012

Velon-taraina tanteraka amin’izao fotoana izao ireo zanak’iny distrikan’i Betroka iny nohon’ny afitsok’ireo mpitandro filaminana nalefa hampandry tany any amin’izany faritra izany. Araka ny taratasy nalefan’i Ernest RANDRIANASOLO, manakanto fantatra amin’ny anarana hoe D'GARY, dia tanana miisa 15 hatramin’izao no kilan’ny afo tamin’ny fandoran’ireo mpitandro filaminana azy ireo. Ny foko Zafindrav'ala no nambarany fa mitondra ny tsy eran’ny aina noho izany famoretana azy ireo izany. Toy izao indrindra no votoatin’izany taratasy nalefan’ity mpanakanto ity tamina

tompon’andraikim-panjakana amin’izao fotoana izao. « Voninahitra lehibe ho ahy Andriamatoa Ministra no ahazoako manoratra an'ity resaka mikasika ny faritra An-driry antsimo-antsinanan'ny District-Betroka ty ,aty aminao .Tena amin'ny alahelo ny tenako amin'izao ora anoratako izao, fa nagnino loatra ny foko Zafindrav'ala ? »
Dia ireto ny Fokontany sy ny Komitim-pokontany zay nodoran'ireo gendarme-militiare : Voromiantsa, Miary, Bekivozy, Ambaro-ambany, Ambaro-atety, Manombo, Mahatsinjo, Angnezandava, Ambatomazaka, Morafeno, Egn'omby, Amboandelaky, Abetsizaray, Ambaibo, Ambalasoa.
Ireo Fokontany sy Komitim-pokontany ireo d'efa teo hatr'izay nisian'ny tany tamin'ny faha-razanay sy efa anaty ny bokim-panjakana hatramin'ny andron'ny mpanjanan-tany (Colon) fa maninona no atao an-kasomparana toy izao ?
Ny tena LOZA dia ny « VY LAVA » na VIARARA may daholo, ny trano misy ny Lonaky-mpanjaka ! Fa magnino tsy resahina, atao loa-bary an-dasy ny nahatonga ny halatra tsy mba mijano ! .
Fantatro loatra ny fandehan'izy io, zay ao amin'ireo tononkirako hatr'izay sy hatr'izao. Ohatra : Alatsaho balansy, Betepotepo, Vavarano Andriry, Very gny bado .....f'efa nanentana zaho sy nanambara ny zava-misy rehetra fa ts'isy nihetsika ny tao amin'ny Fitondrana, hatr'izao !
A) -F'efa tany amin'ny 2eme Repoblika no nitsiry ny atao hoe Malaso-kapa zay no nirongatra ity olona roapolo, dimampolo ...sivampolo no manafika tanana zany ary ny fitaovam-piadian-dry zareo tamin'izany dia basim-borona, kalacknikov fa naninona ny mpitondra sy ny gendarme-militaire tamin'izany tsy nehetsika nefa f'efa maro ny olona ny maty satria dia tamin'io no niantombohan'ny “CORRUPTION-ABUS”, dia hatr'izao izy io vao maika mitombo , fa dia ny tsy mahay mamaky teny sy ny tsy mahay manoratra foana no voamafy .

Ka izaho tompoko dia sarotiny ny amin' ny fanapotehina ny fananan'ireo olona zay tsy manantsiny, tsindritsindriana ... amin'ireo olona any ambanivohitra zay tsy mba misy mpiaro, tsy mety zany ary tsy azo ekena .
Hiverina ny amin'ny zava-miseho any Betroka amin'izao zaho: fa dia nagnino loatra ny foko Zafindrav'ala no potehina !
Mino aho fa mba ho namako ianareo ny amin'ny handraisana anjara hiaraka hamaha-ny olana sy ny hampijano ny fomba-fiasan'ireo gendarme-militaire any Betroka io .

B) -Fa maninona ny tena manao ny ratsy no samborina, karohina fa tsy ny Fokontany no dorana dia ahoana zany reo zaza, ampela, olo-be zay ts'isy sakafo,ts'isy lamba,.....
Iaraha-mahita fa tsy mba nisy zay fitondram-panjakana hatr'izay sy hatr'izao mba mametraka mazava ny foto-drafitra(infrastructures) any amin'ireo Fokontany ireo « ts'isy lakilasy (ecole), ts'isy biraon'ny Filoham-pokontany, ts'isy trano fitsaboana ,ts'isy ny rehetra ...dia ahoana ny hanazavana an'izany ? dia mba aiza ny anjaran'izy reo amin'ireny vola fanampiana zay omena ny Commune-rural ireny (subvention zay avy amin'ireo vahiny ...ny vola avy amin'ny Min-decentralisation) dia maninona no tsy mba misy manao ny Audit- amin'ireo Maire fa dia ny tsy manantsiny foana no voamafy ».