Tanana miisa 21 namidin’ny fanjakana?

19/03/2013

Mbola tsy fantatra hatreto na tsy maintsy handao ny toeram-ponenany sy ny toeram-pivelomany ireo ny mponina ao amin’ireo tanana miisa 21 any amin’ny kaomina 03 ao amin’ny distrikan’Ihosy, faritra Ihorombe, na tsia. Araka ny vaovao avy any amin’ny fikambanana mpiaro ny tany dia hiroso amin’ny fametrahana baorina amin’ny tany mirefy 10 000 ha any amin’izany faritra izany ny sampandraharaham-panjakana miandraikitra izany. Amin’ny anarana orinasa vahiny izany izany fametrahana baorina izany, ary mahakasika mivantana ireo tanana miisa tanana miisa 21 ireo.

Raha nomen-tsiny tamin’ny fifampiraharahana tamina orin’asa vahiny momban ny fazoan’ity farany velaran-tany hambolena eto Madagasikara ny fitondran-dRavalomanana dia lehibe lavitra noho izany ny ataon’ny fitondrana tetezamita amin’izao fotoana izao. Fantatra araka ny loharanom-baovao avy amin’ny fikambanana mpiaro ny tany sy ny zon’ireo tompo-tany, fa hanao baorina tany manana velarana mihoatra ny iray alina hektara ( (maherin’ny 10.000ha) izay mahakasika tanàna miisa iraika ambin’ny roapolo (21), ao amin’ny Kaomina telo (03) ao anatin’ny Distrikan’i Ihosy, Faritra Ihorombe ny sampandraharahan’ny fananan-tany any an-toerana. Hatao amin’ny anarana orinasa vahiny izay efa mamboly amina velaran-tany goavana any amin’izany faritra izany ity fametrahana baorina ity, raha araka ny loharanom-baovao ihany. Tsy iza izany orinasa izany fa ny “Tozzi Green” izay nisalotra anarana vaovao atao hoe “Triangle vert”. Tompon’andraikitra ambony sady mpanao politika amin’izao fitondrana tetezamita izao no voalaza fa mifandray tendro amin’ity orin’asa ity ka nazoany izao tany goavana izao.
Marihina fa efa ela no nitarainan’ireo mponina ao amin’io faritra io ny amin’ny fanosihosena ny zony momba ny fizakana ireo tany ireo. Hatreto anefa dia tsy mba nohenoina ny fitarainan’izy ireo. Marihana fa ny Foko Bara no tena monina ao amin’io faritra io, izany hoe iray amin’ireo foko valo ambin’ny folo misy eto Madagasikara izay manana ny soatoaviny sy ny kolotsainy mifototra amin’ny fifampihankinan’ny Olona, ny Tany, ny Omby ary ny Rano. Marihina ihany koa fa maro ny efa mahita taratra fa tsy dia ny voly savoa (jatropha) araka ny fangatahana nataony no tena tanjon’ity orin’asa ity any an-toerana fa ny hitrandraka ny harena ankibon’ny tany misy ao amin’io faritra io izay lazain’ny manampahaizana momba ny fitrandrahana harena ankibon’ny tany fa mety hisy diamondra sy volamena ary vatosoa isan-karazany.
Tsy manara-dàlana
Fantatra fa ny lalàna vaovao mifehy ny fananantany tamin’ny taona 2005 (Làlana laharana 2005-019 tamin’ny 17 oktobra 2005) no mametra ny fotokevitra mifehy ny momba ny sata-tany eto Madagasikara). Ity làlana ity izay nanafoana ny fotokevitra tamin’ny fanjanahan-tany, izay milaza fa ny tany rehetra tsy vita titra dia an’ny Fanjakana (presomption de domanialité). Ny lalàna vaoavao voalaza etsy ambony kosa dia milaza fa ny tany izay efa nipetrahana sy nohajariana nandritra ny fotoana maro araka ny fomba amam-panao eo an-toerana nefa tsy vita titra dia heverina fa an’izay nampiasa sy nanabe voha azy (And. 33 ny lalàna lah: 2005-019).
Marihana fa araka io lalàna tamin’ny taona 2005 sy ireo lalàna rehetra izay nampihatra azy dia nanafoana ireo lalàna tany amin’ny taona enimpolo tahaka ny lalàna laharana 60-004 tamin’ny 15 febroary 1960. Hatramin’ny taona 2005 dia misy sata-tany vaovao izay neken’ny lalàna dia ny “Tanin’olontsotra tsy vita titra” (Propriété foncière privée non titrée), ny lalàna laharana 2006-031 tamin’ny 24 novembre 2006 no mifehy io sata tany vaoavao io. Tsy voahaja velively io lalàna io raha zohiana ny ampihimamba ataon’ny Fanjakana Tetezamita sy ny Tozzi Green na Triangle Vert no jerena. Ireto avy ireo tanàna iraika ambin’ny roapolo (21) ireo: Ivato Ouest, Fenoarivo, Bevaho, Vavalovo, Satrapotsy, Akatrakatra, Andiolava, Ambararatabe, Manatamia, Ambondro, Ankotoriky, Maharivo, Bemavo, Andranoboky, Soavinonjy, Ambakoa, Langay, Satrokala, Mihary Fanatoliza, Bemelo, Ampandrambe.
Fananan’ny mponina ao amin’ireo tanàna 21 ireo ny tany rehetra mbola tsy vita titra hatramin’izay izay efa nitoerany sy nampiasainy ela araka ny fomba amam-panao eo an-toerana. Manarak’izany dia tsinjo etoana fa ny fanatsatohana baorina izay hataon’ny Fanjakana tetezamita dia tsy miraharana velively ny zon’ireo mponina ireo araka ny lalàna velona. Ny mpitondra ankehitriny dia mbola mihevitra fa raha mbola tsy vita titra ilay tany dia an’ny Fanjakana nefa tsy marina velively izany raha ny lalàna velona no jerena. Ireo mponina ao amin’io faritra io no tompon’ny tany amin’ireo faritra rehetra nitoerany sy nampiasainy araka ny fomba amam-panao izay mbola tsy nisy titra hatramin’izay. Noho izany ny fanaovana baorina ireny toerana ireny dia tsy ara-dalàna velively.
Arak’izany dia tsy voahaja ny andininy faha 33 ny lalàna laharana 2005-019 sy ny andininy faha 2 ny lalàna laharana faha 2006-031 mahakasika ny fanekena ny fomba amam-panao ho antoky ny fizaka-manana na maha tompon’ny tany.