Nitokona ny taxi-ben’Ivato

19/03/2013

Nitsahatra ary tsy nety niasa ireo taxi-be mampitohy an’Ivato sy ny renivohitra nandritra ny tontolo andron’ny omaly. Fiara vitsy dia vitsy no hany niasa tamin’io zotra io, omaly, ary izay niasa dia nosakanan’ireo namany tsy hanao izany. Araka ny fanazavana nomen’ireo mpitatitra izay nanao ny fitokonany dia noho ny fanararaotam-pahefana ataon’ireo polisy kôminaly izay manao didiko fe lehibe amin’izy ireo no anton’izany fanehoana tsy fahafaliana izany. Nambaran’izy ireo fa misambotra tsy an-drariny ary mikasi-tanana ireo mpamily na ireo mpanampy ny mpamily mihintsy ny mpitandro filaminana avy amin’ny kaomina, na ireo antsoina hoe “mavo satroka”, araka ny fiantson’izy ireo azy. Mbola ny loharanom-baovao avy amin’ireo mpitokona ihany koa no nahafantarana fa tsy manara-dàlana ny fanasaziana ataon’izy ireo. Ary farany dia isan’ny nahatonga izao fitokonana izao ihany o any fitakiana vola mihoam-pampana ataon’ireo polisy kominaly ireo ihany.

Nambaran’ireo mpitatitra nitokona fa manao kolikoly tafahoatra ireo polisy monisipaly ireo. Naneho ny tsy fahafaliany sy ny fanoherany izany fihetsiky ny polisy kaominaly eto Antananarivo izany araka ny efa nambara tetsy ambony, no anton’ny fitokonan’ny mpitatitra tao amin’ny zotra mankany Ivato omaly.
Tsara ny manamarika tsy naharitra afa-tsy indray andro ity hetsika nataon’ny mpitatitra mampitohy ny renivohitra sy ny kaomina Ivato ity. Izany hoe hiverina hiasa izy ireo amin’ity androany ity. Na izany na tsy izany dia hisy ny fihaonana eo amin’ireo rehetra voakasik’ity raharaha ity androany. Isan’ny handray anjara amin’izany fihaonana izany ny avy ao amin’ny fiadidiana ny tananan’Antananarivo sy ireo kaoperativam-pitaterana andrenivohitra ary ireo vondron’ny mpitatitra. Antenaina fa ahita marimaritra iraisana manoloana ity raharaha ity ny andaniny sy ny ankilany mba hialana amin’ny fasahiranan’ny mpanjifa izay navesatra dia navesatra rah any tontolo andron’ny omaly no resahana.