Rakotry ny foza orana

29/10/2012

Mbola tsy nikatona hatramin’izao ny taom-panjonoana baraoa any amin’ny Farihin’Alaotra raha eo antenantenan’ny volana oktobra no fikatonan’izany isan-taona. Nisy nadrotsaka foza orana ihany koa ao amin’ity farihy ity, ary mirongatra izay tsy izy ity karazan-poza mpanimba voly sy mpanimba zana-trondro ity. Manahy manahy mafy ny hisian’ny fitongonganan’ny lalm-piarihana jono any amin’ny manodidina ity farihy ity, arak’izany ny mponina any an-toerana.Mandravarava ny foza orana. An-taoniny isan’andro no voaangon’ny mponina manamorina ny farihin’Alaotra,

amin’ity karazam-poza ity.2000 ariary kosa no hany ivarotan’ny mponina ao Vohitsara ny iray “seau” amin’izany. Hatreto dia tsy fantatra marina izay nahatonga ireo foza orana ireo tao amin’ity farihy lehibe eto Madagasikara ity. Fantra kosa anefa etsy an-danin’izany fa tandindomin-doza ireo baraoa sy besisika ary pirina ao amin’izany farihy izany nohon’ny fisian’ireto foza orana ireto. Tandindomin-doza torak’izany ihany koa ny voly vary noho ity karazam-poza ity manapotika ny fototry ny vary ity.
Mitaky ny hanaovana fanadihadiana lalina amin’izay antony nahatonga izao fiparitahan’ny foza orana any Alaotra izao arak’izany ireo mponina any an-toerana. Araka ny nambaran’ny mpikambana iray ao amin’ny fikambanana ARIAL (Association régionale des intellectuels d’Alaotra) dia midika ho fanapotehana ny fiveloman’ny mponina any amin’iny faitra iny, ary fanapotehana ny maha sompitr’i Madagasikara ny faritra Alaotra ny fandrotsahana foza orana tany amin’ny farihin’Alaotra ity.
Fitantanana gaboraraka
Tondroin’ity fikambanana ARIAL ity ho isan’ny rangory fototry ny afo amin’izao fiparitahan’ny foza orana izao ihany koa fisian’ny fitantanana gaboraraka ataon’ny lehiben’ny Faritra any an-toerana. Noraisin’izy ireo ho ohatra amin’izany ny tsy mbola fisian’ny naoty manakatona ny taom-panjonoana Stamin’ity taona ity raha isaky ny tapaky ny volana oktobra no anaovana izany isan-taona. Hatramin’izao fotoana izao dia mbola tsy mikatona ny jono ao amin’ny farihin’Alaotra ary mbola manjono toy ny mahazatra ny mponina. Nambaran’ity mpikambana ao amin’ny ARIAL ity fa nohon’ny maha zanaky ny faritra tena manamorona ny farihy an’I Lehiben’ny faritra no tsy nadraisany fanampahan-kevitra hanakatona ny fotoam-panjonoana. Nambarany, hoy izy, fa tsy afaka ny hanakatona ny fotom-piveloman’ny mponina any amin’ny tanana nihaviany ny tenany. Marihina anefa fa mety hiteraka tsy fisian’ny trondro intsony ao amin’ity farihy ity ny tsy fisihan’ny fikatonan’ny taom-panjonoana. Mandritra io fotoana io tokoa no hanatodizan’ny trondro.
Marihina fa ankoatr’izay fitantanana gaboraraka izay dia isan’ny loza mitatao ho an’ny farihin’Alaotra ihany koa ny faritran’ny rano tsikelikely vokatry ny fikaon’ny riaka ireo tendrombohitra manodidina sy vokatry ny fandorana ny zetra izay manamaina ny tany any amin’iny faritra iny.