Voasambotra i Dina Kankana

19/03/2013

Eo am-pelantananan’ny mpitandro filaminana amin’izao fotoana izao ilay jiolahy fanta-daza antsoina hoe Dina Kankana izay voaroiroy tamina asan-jiolahy maro dia maro teto Antananarivo sy ny manodidina. Toy izao ny tatitry ny mpitandro filaminana mikasika ny asan-jiolahy nandraisan’I Dina Kankana anjara

Tokantrano roa mifanao ambony sy ambany no notafihin’ny jiolahy mitam-basy teny TSIADANA ny marainan’ny 7 janvier 2013. Nandondona varavarana izy ireo tao amin’ny rihana voalohany ; vao nivoha ny trano dia basy no nirangaranga ary niditra ankeriny ireo jiolahy telolahy. Lasa ny vola mitentina 700.000 ariary sy finday ary camera.
Rehefa avy eo dia niakatra tao amin’ny rihana faharoa ireo jiolahy ary nilaza fa fianakavian’ilay vehivavy mipetraka ao amin’ilay trano, rehefa nandinika ilay olona tao antrano dia nino tokoa satria mitovy endrika amin’ilay olona nolazainy fa havany ilay niteny ka namoha ny trano saingy basy no niranty teo amin’ny lohany ka niditra moramora ireo jiolahy ary lasan’ireo jiolahy ny vola sy fitaovana maromaro tao amin’ity trano ity. Lasa nandositra izy ireo rehefa azony izay nilainy.
Fanomezam-baovao avy amin’ny olona tsara sitrapo no nahafan-tarana fa i Dina kankana sy ny tariny no nahavanona ny fanafihana ary voalaza fa mitsabo ny havany any amin’ny hopitaly izy ka ny 12 Mars 2013 no voasambotra i Dina kankana. Rehefa nantsoina ireo olona voatafika mba hampifanatrehana amin’ity voasamotra ity dia nanizingizina ny rehetra fa i Dina kankana izay naseho azy ireo io no lehiben’ireo jiolahy nanafika azy ireo sy nibaikobaiko tamin’io fotoanan’ny fanafihana io ary i Dina kankana mihintsy ilay nisandoka ho fianakavian’ilay vehivavy mipetraka tao amin’ny rihana faharoa.
Fitoriana hafa izay mahakasika an’i Dina kankana ihany no nanohizana ny famotorana satria nisy olona nivarotra fiara Mercedes tao amin’ny gazety vidy varotra ka nisy olona niantso ary nifanao fotoana teny amin’ny fiaro Ampefiloha ny 03 mars 2013. Tonga teny ilay tompona fiara ary lehilahy iray no nihaona taminy ka noentin’ity lehilahy ity nankeny amin’ny CNAPS Ampefiloha fa hisy mécanicien hijery raha tsara na ratsy ity fiara ity. Tonga teny an-toerana ny roa tonta ary nisy lehilahy niandry teny ka io no nanao ny asan’ny mécanicien ary nisy lehilahy iray fanin-telony nanantona ka nanambana basy an’ilay tompona fiara. Raikitra ny fifandonana ka nitsoaka ireto jiolahy ireo ary lasany ny kitapo misy vola 2.000.000 ariary sy ny finday ary ny antotan-taratasy mahakasika ny fiara sy ny tompony. Tamin’ny fanadiadiana nataon’ny polisy no nahafantarana fa i Dina kankana ny iray tamin’ireo jiolahy ireo satria miavaka ny tarehiny izay miendrika karana ka tsy sarotra fantarina.
Tokan-trano iray hafa indray no mbola notafihin-dry Dina kankana sy ny tariny teny Manakambahiny ny 25 janvier 2013. Nanao akanjon’ny mpiasan’ny jirama ny roalahy ary I Dina kankana kosa nanao akanjo tsotra ary nitondra facture-ny Jirama ary nilaza tamin’ny tompon-trano fa jirama hijery ny rano izy ireo fa misy tsy mety ilay rano. Nampandroso azy ireo ny tompon-trano ary rehefa tafiditra izy dia nanambana basy ny tao an-trano ary nifandray an-telephone tamin’ilay mpiasa tao taloha nanontany ny misy ilay vata fitoeram-bola. Rehefa azon’izy ireo ny vola mitentina 100.000.000 ariary sy volamena dia nandositra no nataony ka tany Tsarahonenana no nalehany izay toerana misy ilay mpiasa vavy mpiray tetika aminy. Efa voasambotra ilay mpiasa vavy sy ny namany roa ary efa naiditra amponja fa I Dina Kankana kosa izao vao voasambotra ary atolotra ny fitsarana androany 18 mars 2013.