Mitaraina ny fikambanana Fagnomba

19/03/2013

Ny fikambanana Fagnomba dia fantatra hatramin’ny taona 2010 fa mitaky ny hampiharana ny rariny sy hitsiny eo amin’ny fanomezana onitra ireo olona namoy ny taniny izay ampiasain’ny orinasa QMM (Qit Minerals Madagascar), rantsan’i RIO TINTO, ho an’ny fitrandrahana fasimainty ao Tolagnaro, faritra Anosy, any atsimo atsinanan’i Madagasikara. Nandrity ny herinandro izay niantomboka ny 11 marsa 2013 teo no voasambotra tao Tolagnaro (Fort-Dauphin) ary nampidirina am-ponja ny mpikambana ao amin’ny fikambanana Fagnomba miisa 15 eo eo, anisan’izany ny filohany Perle Zafinandro Fourquet. Nohamarinin’ny fianankaviany fa mbola samy migadra izy ireo izao.

Inona no niampangana azy ireo ? Inona no antony nampidirana azy am-ponja ? Noho izy sahy nanao fihetsiketsehana sy naneho fitakiana momba ny onitra takalon’ny taniny ve ?
Miangavy ny tompon’andraikitra any amin’ny faritra sy eo anivon’ny foibe izahay mba hanome fanazavana haingana momba izao fisamborana sy fitanana am-ponja ny mpikambana sy mpiandraikitra ao amin’ny fikambanana Fagnomba izao, na hanafaka azy ireo avy hatrany.
Tsindrinay manokana ny tokony hanajana an-tsakany sy an-davany ny zo fototr’izy ireo amin’ny maha-olom-pirenena azy, ny fahalalahany hilaza hevitra sy hanao fihetsiketsehana, ny fahafahany.

Tsy misy TVM

Efa ho andro maromaro no tsy afaka nanaraka ny fahita lavitra TVM ny mponina any amin’ny renivohitra Anôsy. Izany dia vokatry fahasimban’ny fitaovana manapariaka ny feo sy ny sary. Tsy vao izao no nisehoan’izany fa efa matetika. Marihina fa anisan’ny fandraharam-potoan’ny ministry ny serasera ny hampanara-penitra ireo fitaovam-panjakana amin’ireo masoivoho’ny TVM manerana ireo 119 distrika. Loha laharana amin’izany, hoy izy, ireo renivohi-paritra 22. Hoan’ny renivohitra Anôsy manokana dia mbola ilay fitaovana faha repôblika faharoa no ampiasainy. Fanomezana “camera” sy “micro” ary .fitaovana vitsivitsy no nataon’ny minisitra niaraka tamin’ny fanolorana ny tranon’ny masoivohon’ny haino aman-jerim-panjakana any an-toerana, fony izy nandalo tany. Ny émetteur kosa tsy nasiany resaka na dia efa fantany fa efa tsy manaram-penitra araka ny teny filamatra amin’izao fotoana. Esty andanin’izany, bodoina andian’olona ny tokontanin’ny sampandraharaham-paritry ny serasera any an-toerana. Tsy afaka miasa ankalalahana sy am-pilaminana ireo tomponanadraikitra, vokatr’izany. Ireo radio-paritra ihany sisa no mba ahafahan’ny mpihaino manaraka ny vaovao.