Tera-tany frantsay telo ho roahina

20/03/2013

Manatanteraka hetsika manokana fisavana ireo vahiny monina any Toamasina amin’izao fotoana izao ny sampan’asam-panjakana miadidy ny fanaraha-maso ny vahiny any an-toerana. Araka ny loharaom-baovao dia efa misy ireo tera-tany vahiny izay tsy maintsy ho roahina any an-toerana, ka isan’izany ny teratany frantsay telo izay tsy manana fahazoan-dàlana ara-dalàna hipetraka eto Madagasikara. Misy ihany koa ireo teratany vahiny hafa izay voatery roahina noho ny toetra tsy mendrika ataon’izy ireo sy ny tsy fanajany ny fiandrianam-pirenena. Namafisina ny fisavana ireo tera-tany vahiny monina na koa ireo mandalo ao Toamasina amin’izao fotoana izao.

Araka ny loharanom-baovao avy amin’ny sampan-draharaham-panjakana izay manao izany asa izany dia noho ny baikon’ny minisiteran’ny Atitany izay tonga eo anivon’ny servisy misahana fanaraha-maso ny vahiny sy any amin’ny lehiben’ny distrikan’i Toamasina I no mahatonga izao hetsika manokana izao. Fantatra ary, araka ny loharanom-baovao ihany fa tera-tany vahiny miisa efatra no miandry ny fandroahana azy amin’izao fotoana izao ao Toamasina. Noho ny tsy fananan’izy ireo ny taratasy hahafahany mipetraka maharitra, sy ny toetra mamohafady ataon’izy ireo amin’ny zazavavy Malagasy, ary ny fihetsika mampihaihay tsy manaja fiandrianam-pirenena Malagasy no nahatonga izany fanampahan-kevitra izany araka ny loharanom-baovao ihany. Ny telo amin’izy ireo no tera-tany frantsay. Ny iray kosa tera-tany afrikana tatsimo izay mpiasa teo aloha tao anivon’ny orinasa nampiasain’ny tetikasa Ambatovy ary tapitra fifanarahana araka asa taminy.

Ankilan’izay, araka ny angom-baovao hatrany, dia misy tera-tany vahiny roa ifampitadiavana ao Toamasina ao amin’izao fotoana izao noho izy ireo “mitondra ny tsimok’aretina Sida”, ka mihevitra ny hanapariataka izany amin’ireo zazavavy iarahan’izy ireo. Izay ihany koa no nahatonga ny mpitandro ny filaminana nampitandrina ny mba tsy hiarovan-tena ho an’ireo “mpampanofa tena” sy ireo “maika te-hanambady vazaha”. Ankoatra izay, dia tera-tany frantsay roa no matin’aretina tao Toamasina tamin’ity taona ity. Ny voalohany matin’ny sohihika nahazo azy tao anaty trano fandraisam-bahiny ny volana janoary, ny faharoa kosa antsoina hoe “Hernandez O.C.H”, 39 taona nipetraka tao Tanamakoa, maty noho ny fisotroany ronono izay tsy zakany noho ny aretiny. Ny angom-baovao no nahalalana fa mpivahiny tonga ny 11 marsa teo ity tovolahy ity. Raha ny fanazavana ihany, dia Tanambao V, Ankirihiry, Tanamakoa, Ambohijafy, Andranomadio, Mangarano ary Foulpointe, Mahambo; no tena ahitana ireo tera-tany vahiny tsy ara-dalana monina ao Toamasina, izay hanamafisana ny fisavana satria hanomboka ny fanisana ireo tera-tany vahiny mandalo sy monina maharitra ao Toamasina ankehitriny.