Tafatsangana any Toamasina

20/03/2013

Niampy iray indray ny vondrona politika ao Toamasina ao. Tafajoro any an-toerana ny vondrona politika antsoina hoe “GRAPPE” na “Groupement Régional des Associations et des Parties Politique de l’Est”, izay nadikan’ireo mpikambana ao aminy ihany koa hoe “TAMBABE”.

Ny Prosefora Ratsivalaka no filoham-boninahitr’ity vondrona ity ary i Razanajatovo Simon fantatry ny maro amin’ny hoe Saddam no filoha mpitarika azy. « Ny fahamarinana no foto-kevitra tokana ijoroanay sy hajainay. Izay manaja ny fahamarinana no tohananay sy ho namanay ary ho mpiara-dia aminay ». Izay no nambaran’i Pr Ratsivalaka raha nilaza ny foto-kevitra ijoroan’ny vondrona tarihany ny tenany. Nomarihany hatrany koa fa « fikambanana tsotra sy ara-politika miisa 24 no manorina ny vondrona Grappe, ary izahay ihany no hany vondrona politika manana ny foibenay aty amin’ny faritra ».Vonona ny hiatrika ny fifidianana rehetra ny vondrona araka ny tanjon’izy ireo. Saingy afaka mifanohana amin’ireo vondrona na antoko politika hafa ihany koa izy ireo raha manana ilay « fahamarinana » ijoroany ireo mila fanampiana aminy.
Momba ny raharaha politika amin’izao fotoana izao eto amin’ny firenena kosa, tsy nisalasala ny Pr Ratsivalaka nilaza fa « tsy misy mpanao politika marina sy fanjakana miaro ny marina izany eto Madagasikara amin’izao fotoana izao. Fa ny tena loza izao dia manavendrana ny malagasy ny ankamaroan’ny mpanao politika, hany ka very hasina ny firenena, very harena ny Malagasy ary simba tanteraka ny fiaraha-monina sy ny taranaka » . Namafisiny anefa fa tsy ilaina izany fampihavanana ny Malagasy izany. “Ny Malagasy, tsy niady sy tsy miady ary mbola tsy hiady, fa ny mpanao politika no nifandramatra sy mifandramatra eto, ka izy ireo no tokony hampihavanina », hoy ny fanazavany. « Raha izahay no mahazo fahefana tahaka ny sasany eto, dia isan’ny hapetrakay ny antsoina hoe minisitera ny fahamarinana sy ny ministère de vigilance ; ka ireo olom-be sy ireo manam-pahaizana, manam-panahy manerana ny Nosy no mpikambana ao sy misahana ny asa ao anatiny », hoy hatrany ity profesora ity namarana ny fanazavany.