Tandindomin-doza ny firenena

21/03/2013

Loza mitatao ho an’ny firenena Malagasy ny raharaha ifanolanan’ny kompaniam-piantohana ny Havana sy ny orinasa PGM. Mety hiafara amin’ny fanagiazan’ny fitsarana ara-barotra iraisam-pirenena ny trano fonenan’ny mpianatra Malagasy any Cachan (Frantsa) sy ny volan’ny fanjakana Malagasy any amin’ny Banky any Belzika sy any amin’ny banky frantsay raha resy amin’izany fitsarana izany ny tranom-piantohana ny Havana. Hanaratsy endrika an’i Madagasikara eo amin’ny sehatra iraisam-pirenena ihany koa izany raharaha izany satria hampihemotra ny fahatokisan’ny mpamatsy vola sy ny mpampiasa vola ary ny mpiara-miombon’antoka vahiny. Miantso ireo izay voakasik’ity raharaha ity, indrindra ny mpitondra ny tetezamita sy ny ministeran’ny fitsarana manokana, mba hikaro-bahaolana mialoha amin’ny alalan’ny fifampiraharahana ny Praiminisitra lehiben’ny Governemanta, Omer Beriziky.

“Hisy vokany ratsy dia ratsy ho an’ny firenena Malagasy ny raharaha ifanolanan’ny orin’asa PGM (Polo Garments Madagascar) etsy an-daniny, ary ny Kompaniam-piantohana Ny Havana, etsy an-kilany, raha sanatria ka miziriziry tsy hikaro-bahaolana amin’ny alalan’ny fifanantonana isika”. Izay no nambaran’ny teknisianina avy ao anivon’ny primatiora, raha nanazava tamin’ny antsipirihany ny votoatin’ity fifanolanana ity izy ireo, omaly teny amin’ny Lapan’i Mahazoarivo. Araka ny fanazavana ihany dia efa eny amin’ny fitsarana ara-barotra iraisam-pirenena ity raharaha ity amin’izao fotoana izao, ary ny fanjakana Malagasy mihintsy no voatointoina satria izy no tompon’ny petra-bola be indrindra ao amin’ny Trano toantohana Ny Havana. Fantatra ary fa mety ho giazan’ny fitsarana iraisam-pirenena mba hanonerana ny volan’ny PGM ny volan’ny fanjakana Malagasy any amin’ny Banky any Belzika sy ny any amin’ny Banky any Frantsa raha toa ke resy eo anatrehan’ny fitsarana iraisam-pirenena momba ny varotra izy amin’ity raharaha ity. Mety ho giazan’ny fitsarana iraisam-pirenena torak’izany ihany koa ny trano fonenan’ny mpianatra Malagasy any Cachan any Frantsa.
Tsara ny manamarika fa hatreto dia resy hatrany ny Trano fiantohana Ny Havana tamin’ny fampakarana ity raharaha ity teo amin’ny fitsarana isan’ambaratonga teto Madagasikara. Noho ny baiko avy amin’ny ministeran’ny Fitsarana anefa dia nodidiana tsy hanefa ny onitra tokony homeny ny orinasa PGM ny Tranom-piantohana Ny Havana. Ny fitsarana, arak’izany, no rangory fototry ny afo ka manosika ny Trano fiantohana Ny Havana tsy handoha io onitra io na dia fantany mazava tsara aza fa loza mitatao ho an’ny firenena izany fanampahan-kevitra izany ankehitriny.

Resy teo anatrehan’ny fitsarana Malagasy

Toy izao ny famintinana fohy ny niandohan’ity fifanolanana ity. Orinasa vahiny avy any Belzika, niasa teto Madagasikara (tany Mahajanga) ny PGM ary ny Kompaniam-piantohana Ny Havana no nosafidiany hiantoka azy tamin’izany. Isan’ireo niharan’ny fandrobana sy ny fandorana tamin’ny hetsi-bahoaka tamin’ny taona 2009 ity orin’asa ity. Vokatr’izany dia nametraka fitoriana teny amin’ny fitsarana anbaratonga voalohany teto Madagasikara (tany Mahajanga) izany orinasa izany mba ho fanonerana ny fahavoazany amin’ny fananany fiantohana ao amin’ny trano fiantohana Ny Havana. Ny 20 oktobra 2010 no nivoahan’ny didim-pitsarana izay nanome rariny ny orinasa PGM. Tsy faly tamin’io vokam-pitsarana io kosa ny Trano fiantohana Ny Havana ka nampakatra tamin’ny fitsana ambony tany Mahajanga ihany. Tsy nanova ny didy navoakan’ny fitsarana ambaratonga voalohany anefa ny fitsarana ambony fa ny fanamafisana izany tamin’ny alalan’ny didim-pitsarana 005-C tamin’ny 04 jolay 2011 izany fitsarana izany. Araka ny atontan-taratasin’ady dia nangataka ny fampiharana izany didim-pitsarana izany ny PGM kanefa nangatak fandravana didy kosa ny Trano fiantohana Ny Havana. Tsy manam-pahefana amin’izany anefa ny fitsarana.
Taty aoriana dia nirotsaka nanelanelana tamin’ity raharaha ity ny solontena maharitry ny Vondrona Eropeana eto Madagasikara sy ny mpiandraiki-draharaha Belza eto Antananarivo, ary nanaitra ny fitondram-panjakana Malagasy mba handray andraikitra hampiantra ny didim-pitsarana navoakan’ny fitsarana Malagasy momba ity raharaha ity. Nahagaga anefa fa ny fampiharana ny atao hoe “pouvoir dans l’intérêt de la loi” (PIL) izay navoakan’ny ministeran’ny Fitsarana no nasetrin’ny fitondrana HAT izany. Izany hoe namoaka baiko izay mandidy ny mpitsara tsy hanome alalana amin’ny fampiharana an’io didim-pitsarana ion y ministeran’ny fitsarana na dia hita mibaribary aza fa loza ho an’ny firenena izany fihetsika izany.
Manoloana izany dia niantso ireo rehetra voakasik’ity raharaha ity ny Praiminisitra Omer Beriziky ary naneho mazava tsara fa hiteraka voka-dratsy tsy hita noanoa ho an’ny firenena Malagasy izany, indrindra far aha resy eo anatrehan’ny fitsarana ar-barotra iraisam-pirenena isika amin’ity raharaha ity. Miantso ny rehetra mba hikaroka izay fomba afahana mifampiraharaha amin’izao raharaha izao ihany koa ny Praiminisitra, mba tsy ahatonga ity raharaha ity ho fanapotehana ny firenena.