Sri lankais miisa 9 nosamborina

21/03/2013

Mitohy hatrany ny fanadiovana izay tontosaina any amin’iny Faritra Alaotra Mangoro iny taorian’ny firongatry ny fitrandrahana tsy manara-dàlana ny safira tany amin’ny distrikan’i Didy. Araka ny tatitra nataon’ny Jeneraly Randrianazary, Sekreteram-panjakana miadidy ny zandarmariam-pirenena, omaly, dia teratany Sri lankais miisa sivy no efa voasambotra ary efa notanana am-ponja vonjimaika amin’izao fotoana izao. Tany Didy no nahasamborana ny fito tamin’izy ireo, ary tany Moramanga kosa ny roa. Mazava loatra fa ny tsy fanarahan-dàlana amin’ny fonenana eto Madagasikara sy ny fividianana ny safira tany amin’iny faritra iny no iampangana an’ireto teratany vahiny ireto. Nambaran’ny Jeneraly Randrianazary fa amin’ny 3 avrily ho avy izao no hanatanterahana ny fitsarana azy ireo any amin’ny tribonaly any Aùbatondrazaka. Nanamafy ny tenany fa hanara-maso akaiky izany, ary hidina any an-toerana mihintsy amin’io andro hitsarana ireto Sri lankais ireto.

Fanampahan-kevitra entitra

Marihina fa namory ireo avaram-pianarana avy any amin’ny Faritra Alaotra Mangoro, monina eto Antananarivo ny Jeneraly Randrianazary, omaly. Tamin’izany no nanamafisany fa tandindomin-doza ny tandavan’ala ao Ankeniheny-Zahamena, any Didy, distrika Ambatondrazaka noho ny afitsok’ireo andian’olona mitrandraka tsy ara-dalàna ireo vato safira ao amin’io toerana io. Ny 70 ha-n’ny alan’ny Bemainty ao Ankeniheny-Zahamena dia rava sy potika avokoa. An’arivony ny hazo nokapaina. Rian-drano mirefy 2,5km no simba tanteraka. Feno hadivory sy lavaka ireo toerana voatrandraka. Olona maherin’ny 6.000 no fantatra fa mitrandraka safira ao. Misy fiantraikany amin’ny fiaraha-monina ihany koa ity fitrandrahana safira ity, araka ny tatitry ny Jeneraly Randrianazary ihany. Nanapa-kevitra hanakatona ny sekoly ireo mpampianatra ara-panjakana ao amin’ny CEG sy lycée ary ny EPP satria lasa any amin’ny toeram-pitrandrahana avokoa ny ankamaroan’ny mpianatra indrindra ireo tovovavy tanora. Miray tsikombakomba amin’ireo vahiny « Sri lankais » mpividy vato sy ireo mponina mpitrandraka ireo tompon’andraikim-panjakana any an-toerana. Mikorontana amin’ny ankapobeny ny fiainana ara-tsosialy, toekarena sy fandriampahaleman’ny mponina ary ny tontolo iainana ao faritra Alaotra Mangoro. Marihina fa efa mitatra any amin’ireo toerana maro ny fatrandrahana toa an’ Ambohibe sy Andaingo.
Efa nisy ny fivoriana ny zoma 15 marsa, izay notarihin’i Minisitry ny Harena an-kibon’ny tany sy ny Minisitry ny filaminana anatiny ary ny sekreteram-panjakana miadidy ny Zandarimariam-pirenena. Tamin’izany no nanomezana 48 ora ireo rehetra mitrandraka hialany ao amin’ireo toerana. Hiaran’ny lalàna avy hatrany ireo olona tratra ary hisy ny hetsika manokana ataon’ny mpitandro ny filaminana sy ireo tompon’andraikitra any an-toerana amin’ireo toeram-pitrandrahana ireo.