Tsipahan’ny FMI sy ny Banky iraisam-pirenena

22/03/2013

Efa nampoizin’ny maro ihany ny ho fihetsiky ny mpatsy vola iraisam-pirenena manoloana ny fanampahan-kevitry amboletra nataon’ny Fitondrana Tetezamita tamin’ny fametrahana mpitantana vavao tao amin’ny Banky Foiben’i Madagasikara. Fanampahan-kevitra izay efa nokianin’iny sendikan’ny mpiasan’ny Baky Foibe ihany koa tamin’ny fotoana nanaovana izany. Mazava ary amin’izao fotoana izao ny raharaha satria tsy manan-kery eo anatrehan’ny Tahirim-bola iraisam-pirenena sy ny Banky Iraisam-pirenena ny sonian’ny Governora vonjimaikan’ny Banky Foiben’i Madagasikara. Tsy manan-kery eo anatrehan’ireo mpamatsy vola iraisam-pirenena ireo ihany koa ny vola vaovao kasain’ny fitondrana tetezamita havoaka ato ho ato, araka ny fanampahan-kevitra noraisin’ny Filankevitry ny Minisitra notarihan’ny filohan’ny HAT Andry Rajoelina. Ny taratasy izay nalefan’ny FMI ho an’ny Banky Foibe no nahafantarana izany.

Marihina fa efa fantampantatra mialoha ihany ity raharaha ity, raha araka ny nambaran’ny loharanom-baovao satria efa nisy ny fihetsika izay nataon’ny FMI izay nahitana taratra fa tsy mankato ny Governora mpisolo toerana ao amin’ny Banky Foibe izy ireo. Isan’izany ny tsy namalian’izy ireo ny fanomezan’ity Governora ity ny lisitr’ireo mpiasa izay alefa hanao fihofanana toy ny fanao isan-taona.
Mazava loatra fa hisy fiantraikany goavana eo amin’ny toe-bolam-pirenena izao tsy fankatoavan’ny FMI sy ny Banky iraisam-pirenena ny Governora mpisolo toerana izao, raha tsy hiteny afa-tsy ny tsy fahafahan’ny firenena hifampiraharaha ara-bola amin’ireo mpamatsy vola ireo mandram-pisian’ny rafitra ara-dàlana misolo ny rafitra misy amin’izao fotoana izao. Hisy fiantraikany amin’ny fifanankalozana hataon’ny firenena amin’ny any ivelany ihany koa izany.
Tsetsatsetsa tsy aritra no ilazana fa araka ny loharanom-baovao dia fomba fanao eo amin’ny fifampiraharahana eo amin’ny Banky foibe sy ny kitapom-bolam-panjakana ny haomezan’iry voalohany fampindramam-bola 15% amin’ny fammpidiran-ketra tokony hiditra amin’ny taona diavina. Izany hoe homen’ny Banky foibe hampiasain’ny fanjakana ny vola manandrify ny 15% amin’ny vola tokony hampidiriny amin’ny taona iray mba afahan’ny fanjakana miasa araka ny tokony ho izy. Hatramin’izay dia voahaja hatrany izany fomba fiasa izany. Amin’izao fotoana izao anefa, araka ny loharanom-baovao dia efa mihoatra lavitra an’io 15% n’ny vola tokony ho azo amin’ny fampidiran-ketra io no nalain’ny fanjakana tamin’ny Banky Foibe. Antony ilazana fa tsy mandeha amin’ny laoniny intsony ny fanajana ny fenitra eo amin’ny fitantanam-bola ao amin’ny Banky Foibe izany.
Tsar any mampatsiahy fa tamin’ny volana febroary taona 2012 no nandray ny toerana ho Governora mpisolo toerana I Guy Ratovondrahona. Nisy ny fanoheran’ny sendikan’ny mpiasan’ny Banky Foibe izany fanendrena izany saingy noho ny antsonjay izay natao azy ireo dia tsy nahomby izany fanoherana izany. Maro tamin’ireo mpiasa nanao ny fitokonana no nafindra toerana na koa nahazo sazy henjana.