Navotsotra izy 15 mianadahy

22/03/2013

Noafahan’ny fitsarana madiodio ireo mpikambana miisa 15 mianadahy avy ao amin’ny fikambanana Fagnomba izay naiditra am-ponja noho ny raharaha nanenjehana azy ireo. Izany dia taorian’ny fisehoany teo anatrehan’ireo mpitsara. Raha tsiahivina dia nandritra ny hetsika izay nandraisan’izy ireo anjara ka nitakian’ny mpanao fihetsiketsehana ny hamoahana ireo namany zay notazonina tany am-ponja no nisamboran’ny zandary azy ireo, herinandro lasa izay.

Ny filohan’ny fitsarana ambaratonga voalohany sy ny lehiben’ny fampanoavana no nisahana ny fitsarana. Feno hipoka ny efitrano fitsarana nandritra ny fihainoana azy ireo. Mbola nahitana olona marobe ihany koa tany ivelan’ny trano fitsarana.Tsy nahitana mpitandro filaminana kosa teny an-toerana, araka ny nambaran’ny loharanom-baovao.
Rahefa nohalalinina ny fiampangana azy ireo dia tsikaritra fa tsy mitombina ary dia novotsorana izy mianadahy avy. Akory anefa ny hagagana fa taorian’ny nilazana fa afaka madiodio dia mbola tsy navela nivoka ny fonja nitazonana azy ny 9 mianadahy hafa. Araka ny ny loharanom-baovao dia mbola tazonina izy ireo noho ny fisian’ny atontan-taratasy hafa mahakasika azy. Ny mpitsara ihany no tompon’ny teny farany sy ny fanapahan-kevitra.
Mitohy ny fitakiana
Ankoatr’izay dia fantatra ihany koa izao fa ny alakamisy 28 mars ho avy io no no tsaraina ny raharaha mahakasika ireo efatra mianadahy izay voaroiroy tamin’ny fahavakisan’ny trano fiasan’ny CENI-T n any CED tany Tolagnaro, andro maromaro lasa izay. Anisan’izany ny filohan’ny hetsika Fagnomba ZAFINANDRO Perle miaraka amin’ny mpiambina azy. Marihina fa samy mbola any am-ponja vonjimaika izy ireo amin’izao fotoana izao. Mbola tantatra mitohy arak’izany ny disadisa misy any an-drenivohitr’Anôsy.
Tsy nanadino ny nanolotra fisaorana ny tompon’andrikitry ny Fitsarana any Tolagnaro kosa ireo mpikambana ao amin’ny Fagnomba sy ireo fianakavina noho ny fitsarana izay hitan’izy ireo fa nandeha tamin’ny tokony ho izy. “Ny toy ireny ihany koa no tokony hiseho amin’ny fitsrana ireo namanay zay fantatra fa tsy tompon’antoka velively tamin’ny famakina sy fangalarana any fitaovan’ny CED”, hoy ny fanamarihan’izy ireo. Etsy andanin’izany, na eo aza izay fitsarana ireo mpikambana Fagnomba izay mbola any amponja ireo dia nilaza ny filoha lefitry ny Fagnomba, Sedera Joel, fa tsy hijanona fa mitohy ary hihamafy hatrany ny tolona ataon’izy ireo. Nanainga ireo mpiara-mitolona sy ireo vonona hiaro sy hiady ny tombotsoan’ny faritra ny tenany mba hiray hina ary tsy ho samatsamahan’ireo tia kely sy fatram-piaro ny tombotsoany manokana.