Manamboninahitra zandary sy polisy voarohirohy

23/03/2013

Mbola tsy foana hatramin’izao ny fanondranana an-tsokosoko ny harem-pirenena. Tamba-jotra iray mpanondrana bolabolana andramena indray no saron’ny mpanao fanadihadiana avy amin’ny primatiora, omaly tany Toamasina. Tao an-tokotanin’olo-tsotra no nahatratrarana ireo bolabolana andramena izay nafenina fatratra. Ny fanadihadiana kosa no nahafantarana fa kolonelin’ny zandary sy polisy miasa ao amin’ny orinasa Madarail no miara-miasa amin’ilay olona nahatratrarana an’ireo andramena ireo.

Tamba-jotra iray hafa, nefa mety hisy hifandraisana amin’ireo efa nadre matetika amin’ny raharaha fanondranana antsokosoko andremena ity sarona tany toamasina ity. Manamafy izany ny fanazavana avy amin’ireo iraka manokana avy ao amin’ny Primatiora izay nanatontosa ny fanadihadiana tany an-toerana ka nahatratrarana an’ireo bolabolana andramena ireo, omaly. “Tena tamban-jotra tsara paika ny mpanao azy ity, hita ao anatiny avokoa na mpitandro ny filaminana, na olom-panjakana ambony, ary ireo mpandraharaha milaza azy ho tsy refesi-mandidy”, hoy ny fanazavan’izy ireo. Tao amin’ny fokontanin’Ampasimazava Bd Paul Doumer no nahatrarana ireo andramena ireo. Tao amin’ny tokotanin’ny lehilahy iray mponina ao amin’ity fokontany ity. Ny fanazavana nataon’ireo mpanao fanadihadiana ihany koa no nahafantarana fa miara-miasa amina kolonely iray avy ao amin’ny zandary any Toamasina ity lehilahy nahatratrarana andramena ity. Havana tompona haino aman-jery eto an-drenivohitra ilay kolonely, raha araka ny fanazavana ihany. Ankoatr’izay dia fantratra ihany koa mbola misy polisy iray miasa eo anivon’ny kaomisarian’ny orinasa Madarail, miara-miasa amin’izy ireo. Antony izay nahasarotra ny fanadihadiana, araka ny fanamarihan’ireo iraka avy amin’ny primatiora. Fantatra kosa afa tetsy an-danin’izany fa angom-baovao avy ao anivon’ity orinasa ity ihany no nahafantarana ny fisian’izao tamba-jotra izao.

Alefa amin’ny Madarail

Tsy sambany no nanondrana andramena ity tamba-jotra ity. Ny angom-baovao no nahafantarana fa efa im-balo izy ireo no nanondrana izany tany ivelany ary faha-tsiviny no izao tratra izao. Teo am-piandrasana ireo fiara be avy ao Mahambo sy sambo iray avy any Tanambe izy ireo no tra-tehaky ny mpanao fanadihadiana. Araka ny fanampim-baovao dia efa eo am-pitadiavana izany sambo izany sy ireo fiara ireo ny mpitandrofilaminana amin’izao fotoana izao.
Araka ny fanazavana dia eo amin’ity tokotany ity izy ireo no manafina ireo andramena ery eo ihany koa no mameno ny kaontenera ka rehefa mahafeno kaontera iray dia alefa ny entana. Ny angom-baovao ihany no nahalalana, fa maka kaontenera misy entana avy any ivelany ireo tamban-jotra, afindra kaontenera hafa ny entana ka ampiasaina izany avy eo. Avoaka amin’ny lalam-pirenena faharoa ny kaontenera feno andramena avy eo ary averina amin’ny alalan’ny fiaran-dalamby an’ny orinasa Madarail izay manana fidirana manokana eo anivon’ny seranan-tsambo. Manomboka eo no tena mampiasa ny fahaizany ny tamban-jotra, ka ny fanovahovana ny “plomb” sy fampiasana “vola be” no isan’ny fomba fiasany mandram-panondranana ny hazo. Ny brigadin’ny zandary misahana ny heloka be vava no misahana ny fanadiadiana izay nanomboka omaly, ka andrasana ny fandehan’ny raharaha satria ny fampanovana mihintsy no nanome ny “requisition” ny alakamisy tamin’ny 07ora hariva, nanokafana ny fanadiadiana.