Couche no nanavotra ilay zaza enim-bolana

23/03/2013

Tonga nijery ifotony ireo mponina tany amin’ny distrikan’Ambato Boeny, taorian’ny farendrehan’ny sambo iray izay nahafatesana olona miisa 12 ny mpikambana vitsivitsy avy amin’ny Governemanta. Nandritra izany fitsidihana izany no nahafantarana fa sambo vao avy namboarina ary sambany vao hiasa ilay sambo izay dobo an-drano ny zoma 15 Desambra lasa teo tao amin’ny renirano fihaonan’i Komory sy Betsiboka, ao amin’ny kaominina Ambato Maromay. Ny fanazavan’ny talen’ny APMF Mahajanga no nahafantarana fa noho ny fahamaroan’olona niondrana tamin’ilay sambo no nahatonga ny firendrehana. Tokony ho 30 ihany no zakan’ity sambo ity satria mirefy eo anelanelan’ny 11 ka hatramin’ny 12 metatra ny halavan’ilay sambo izay tsy manana « immatriculation » akory. Amin’ny maha sambo vao hiasa azy dia nampidina sarandalana ho arivo ariary ny mpitondra izany sambo izany. Vokatr’izany dia maro be ny olona niondrana taminy.

Feno olona hatrany ambony tafo ilay sambo. Tsy lasa dimy metatra miala ny moron-drano anefa dia efa nanomboka nitongilana ilay sambo ary nivadimbadika sy niankohoka ka tsy tafanjanona raha tsy efa any amin’ny 150 m miala ny seranana nihondranan’ireo olona. Teo dia nitongilana, izany hoe nirirana ny filetehan’ity sambo ity. Ny rano rahateo niakatra hatrany tamin’io fotoana io.
Araka ny vaovao farany avy amin’ireo fokontany telo izay niavian’ireo mponina niharan’ny loza tamin’ny fivadihan’ity sambo ity dia nahatratra 93 ny olona tao anatiny ary 12 no maty ka ny 4 tamin’ireo dia mbola karohina any anaty rano hatramin’izao. Ny 6 tamin’ireo razana hita kosa dia saika zaza avokoa ary ny 2 no olon-dehibe. 81 no isan’ny olona avotra.

Fanazavana azo avy amin’ny ekipa ny croix rouge nanampy ireo marary sisa velona no nahafantarana fa maro ny ankizy tao anatin’ilay sambo, satria faran’ny herin’andro no nisehoan’ilay loza, izay andro tsena tamin’ny ka handeha hody ny mponina sy ny mpianatra izay any amin’ny 5 Km miala eo Ambato Boeny. Avotra soama-tsara tamin’ity loza ity i Nantena zazavavy kely vao 9 volana : « noheveriko ho lamba sy saché tsy lena ireny ilay zazakely teny ambony rano, kanjo vao nosontomiko dia teo no hitako fa kay zaza ilay izy » hoy Rakotomalala Ernest izay nanavotra ity zazakely 9 volana ity. Ny renin’ilay zaza kosa, maty tao anatin’ny rano. Salama tsara ilay zaza amin’izao fotoana izao na dia mbola misy hafanana kely hoy ihany i Rakotomalala Ernest , izay nandray an-tanana ny fitaizana ity zaza ity. Ankoatra io dia mbola nisy ihany koa kambana roa lahy izay mbola kely tokoa 2 taona sy 2 volana isan’ireo avotra soama-tsara niaraka tamin’ny reniny tamin’ity loza ity.