« Hetraketraky ny groupe Hiridjee ! »

25/03/2013

Nanao valan-dresaka ho an’ny mpanao gazety « tsy matahotra karana » tetsy amin’ny La Rotonde Besarety ny mpisolovava, Me Willy Razafinjatovo, fantatry ny be sy ny maro amin’ny solon’anarana hoe Me Olala, manodidina ny zava-manjo ny orinasa afaka haba Kwok Hing sy ny mpiasa ao amin’izany orinasa izany. Somary nahagaga ihany aloha ny resaka nandeha talohan’ny nanombohan’ilay valan-dresaka. Maro tamin’ireo hainoamanjery izay nantsoina, hoy ny Me Olala no tsy tsy afaka namonjy ity valan-dresaka ity satria hoe « tsy afaka ny hiady amin’i Hassanein Hiridjee tompon’ny First Immo hono ny tompon’ny gazety ». Miankina amin’ny didim-pitsarana hivoaka androany amin’ny iray ora etsy Anosy no hampitombo isa na tsy ireo tsy an’asa eto an-drenivohitra. « Raha mbola misy manitsakitsaka sy mandroba na manao tsinontsinona ny vahoaka Malagasy dia hitsangana hiasy sy hiaro izany hatrany ny tenako sy ny mpiara-miasa amiko », hoy Me Olala. « Ny fitiavam-bolan’i Hassanein tompon’ny orinasa First Immo ve no hahavery asa ireto mpiasa Malagasy miisa 1537 ireto ? Fa angaha an’i Hassanein ity Madagasikara ity ? Marina fa karana ny vadiko saingy tsy hananako hena-maso mihitsy ny miteny izany amin’izao hetraketraka sy fanaovana tsinontsinona ny vahoaka Malagasy ataon’i Hassanenin izao», hoy hatrany ity mpisolovava ity.

Nikatona nanomboka ny faha-19 marsa 2013 teo ny orinasa Kwok Hing noho ny fifanolanany amin’ny tompon-trano dia ny First Immo izany. Mitaky vola 1 tapitrisa dolara na 13 miliara vola Malagasy amin’ity orinasa afaka haba ity ny tompon-trano, araka ny fanazavana nomen’ny mpisolovava. Nanomboka ny taona 2007 no nanofan’ny Kwok Hing izany trano etsy Andranomena izany. Isaka ny telo taona ny “contrat de bail” nifanarahan’ny roa tonta. Nizotra tsara ny fiaraha-miasa ka dia navaozina izany fifanarahana izany ny taona 2010 ary tokony ho tapitra amin’ny volana jona ho avy izao. Ity Kwok Hing ity no isan’ny orinasa afaka haba tsy nanakatom-baravarana nanadritra izao krizy izao ary mbola mandoa ara-dalàna tsar any karaman’ny mpiasa. Teo anelanelan’izay fotoana izay anefa tapa-kevitra ny hanangana toera-mpiasana ho azy manokana ny Kwok Hing, hoy hatrany ireo mpisolovava, ka nampandre ny First Immo fa tsy hanavao ny fifanarahana intsony ho an’ity taona 2013 ity. Avy hatrany dia nitory teny amin’ny Fitsarana ny First Immo ary nahazo didy nanakatona ny orinasa sy figiazana ny entana ary ny kaonty amin’ny banky. Entana efatra “container” tokony halefa any ivelany no tratran’ny “saisie” vokatr’izany.
Tsy ara-dalàna
Nambaran’ny Me Olala fa tsy ara-dalàna ny didy navoakan’ny Fitsarana, nanakatona ny orinasa. “Tsy zakan’izany ordonnance sur requête izany mihitsy ny fanakatonana orinasa mampiasa vahoaka Malagasy amin’arivony. Samy mahay lalàna eto ka tsy azo ekena velively izao zava-misy izao. Ankoatra izany, nisy mpitsara izany niaraka tamin’ny huissier nanatanteraka ny fanakatonana ny orinasa, nampitahotra ireo teratany Sinoa tompon’ny orinasa Kwok Hing. Tsy anjaran’ny mpitsara ry vahoaka Malagasy ny manatanteraka izany scellé izany”, hoy hatrany ny Me Olala. Nomarihan’ity mpisolovava ity ihany koa fa voaloa ara-dalàna tsara ny hofantrano nandritra izay enin-taona izay ary mbola amin’ny volana jona vao tapitra ny « contrat de bail ». Izany hoe, tsy mitombona velively ny fitoriana nataon’ny First Immo, araka ny fanambarana nataon’ny mpiaro ny tombotsoan’ireo mpiasa. Nomarihan’ny Me Olala hatrany fa tokony nampanantsoin’ny Fitsarana ny orinasa Kwok Hing tamin’izao raharaha izao mba nahafahany nametraka Fehinteny. Tsy izany anefa ny zava-nisy fa avy hatrany dia didy no nivoaka. Raha ny tokony ho izy, hoy hatrany izy, dia tsy mahefa amin’izao raharaha izao ny Fitsarana nitondrana ny ady.
Ampihi-mamba
“Manaratsy endrika ny firenena eo imason’izao tontolo izao ny fihetsika tahaka izao. Ary mety ho izay mihitsy aza ny tanjon’i Hiridjee dia ny tsy hatongavan’ireo mpampiasa vola vahiny eto amintsika amin’izay ho azy ireo irery ity Madagasikara ity”, hoy ny Me Olala. Olom-bitsy tokoa mantsy no mifehy ny tontolo ara-toekarena eto amintsika amin’izao fotoana. Afaka tamin’ny ampihi-mamban’ny filoha teo aloha, Marc Ravalomanana ny vahoaka Malagasy ny taona 2009 dia mpangoron-karena olom-bitsy tsy zoviana amin’ny olom-pirenena indray no mandimby izany amin’izao ftiondran’ny filohan’ny HAT, Andry Rajoelina izao. Nambaran’ireo mpisolovava tonga tetsy amin’ny La Rotonde Besarety àry fa vonona ny hiatrika hatramin’ny farany izao fampahoriam-bahoaka ataon’ny groupe Hassanein Hiridjee izao izy ireo, araka izao hitaterana azy izao: “tsy ho vitavita mora ity raharaha ity ary vonona handray andraikitra hatramin’ny farany izahay mpiaro ny tombotsoan’ireo mpiasa Malagasy mizaka ny hetraketra sy ny fitiavam-bolan’i Hiridjee izao”.