Mandoha vola amin’ny miaramila ireo mpitrandraka an-tsokosoko

29/10/2012

Mbola misy ary maro ireo izay manohy ny fitrandrahana safira any amin’ny kaomina Didy, Faritra Alaotra Mangoro. Taorian’ny fialàn’ny mpitandro filaminana avy amin’ny Emmo-nat izay nalefa tany an-toerana hanadio izany faritra izany dia ireo mpitandro filaminana avy amin’ny Faritra Alaotra Mangoro indray no miaro izany toerana izany mba tsy hisian’ny fitrandrahana gaboraraka toy izay efa nitranga herintaona lasa izay. Tsy zany anefa ny zava-misy amin’izao fotoana izao satria avelan’ireo mpitandro filaminana hiditra sy hitrandraka ao amin’izany faritra arovana izany ireo mpitrandraka sy ireo mpividy vato ary ireo mpivarotra enta-madinika samihafa, rehefa mandoa vola amin’izy ireo. Mbola manao be fiavy ao antampon-tananan’Ambatondrazaka ihany koa ireo teratany vahiny mpividy safira.

Mandoha 1 hetsy ariary isan’andro ireo mpandraharaha mpitrandraka safira, 1 alina ariary kosa no alohan’ireo mpivarotra ary 5 arivo ariary isan’olona ho an’ireo mpihady tany. Ireo no vola takian’ireo miaramila sy zandary ary polisy nalefan’ny Faritra hiambina ny toerana izay misy ny fitrandrahana safira any Didy. Rehefa mahaloa io vola io ireo sokajin’olona ireo dia avelan’izy ireo hiditra soamatsara ao anatin’ity valan-javaboahary ity ary afaka manao izay fitrandrahana tiany hatao. Arak’izany dia mbola mitohy ary miha-mahazo vahana hatrany ny fitrandrahana safira ao amin’izany faritra izany. Zava-nisy izay niteraka resabe teto amin’ny firenena ary nahatonga ny fandefasan’ny fitondrana tetezamita mpitandro filaminana handroaka ireo mpidrandraka tao nohon’ny fahasimban’ny tontolo iainana nateraky ny fitrandrahana ataon’izy ireo. Araka ny loharanom-baovao avy any an-toerana dia ao Antsevabe no misy ireo mpitandro ny filaminana izay manara-maso ny fidirana any amin’io faritra misy ny fitrandrahana safira any Didy io. Antsavabe izay kaomina lalovana alohan’ny miditra any Didy. Eo ihany koa no hanaovan’ireo mpitandro filaminana ireo ny fitakiana rakitra ho an’izay hiditra any anatin’ny faritra misy ny safira.
Hofain’ny Sri lankais ny tranon’ny kaomina
Hita taratra ao antampon-tananan’Ambatondrazaka ihany koa amin’izao fotoana izao izany mbola fitohizan’ny fitrandrahana safira any Didy izany. Mbola maro dia maro tokoa ireo teratany sri lankais sy ireo kaomoriana izay efa miorim-ponenana tanteraka ao amin’ity renivohitry ny faritra Alaotra Mangoro ity tato anatin’ny volana vitsivitsy. Izy ireo no mpividy ny vokatra azon’ireo mpitrandraka safira any Didy. Marihuana fa isan’ny manaitra ny maro ao an-tampon-tananan’Ambatondrazaka ny mahita fa ampanofain’ny fiadididana ny tanana any an-toerana amina teratany Sri lankais ny trano natokana ho an’ny filankevitry ny tanana any an-toerana.
Ankoatr’izay dia miteraka fiakaran’ny vidim-piainana ao amin’ity tanana ity ihany koa ny fisian’ireto vahiny maro dia maro izay mpividy safira ireto. Tafakatra hatramin’ny 340 ariary amin’izao fotoana izao ny vidin’ny iray kapoaka amin’ny vary fotsy, ary tsy latsaky ny 3 alina ariary ny vidin’ny gisa iray.
Mbola tsy mivaha arak’izany ny olana momba ny fisian’ireo mpitrandraka safira any amin’ny kaomina Didy, Faritra Ambatondrazaka. Mitazam-potsiny ary mety mahazo tombontsoa manokana amin’izany ireo mpitondra any an-toerana.