“Efa mitovy hevitra ny SADC sy ny Frantsay”

29/10/2012

Nitafa tamin’ireo mpomba azy tao amin’ny Kianjan’ny Magro indray ny filoha teo aloha Ravalomanana rehefa tsy nanao izany nandritra ny herinandro maromaro izay. Mazava loatra fa ny fahitany ny raharaham-pirenena amin’izao fotoana izao sy ny fiverenany eto Madagasikara ary ny filatsahany ho fidina amin’ny fifidiana filoham-pirenena no votoatin’izany tafa mivantana any any Afrika atsimo izany.

Isan’ny nisongadina tamin’ny resaka nataon’ny filoha teo aloha Ravalomanana, tamin’ny asabotsy teo ny filazany fa efa mitovy amin’izao fotoana izao ny tadin-dokanga eo amin’I Lafrantsa sy ny SADC manoloana ny firosoan’i Madagasikara amin’ny fifidianana. Nambarany fa tsy eken’izy ireo intsony amin’izao fotoana izao ilay petra-kevitra hoe “ni ni”. Ny Malagasy no hifidy izay ho filohany fa tsy Maorisy na I Seychelles hoy ny fanamarihan-dRavalomanana. Nanamafy ny maha kandida azy amin’ny fifidianana filoham-pirenena arak’izany ny filoha teo aloha ary nilaza fa tsy ho ela intsony dia ho tafaverina an-tanindrazana. Ny tenany mihintsy, hoy izy, no hanambara izany fahatongavany eto Madagasikara izany.
Ankoatr’izay dia nokianin’ny filoha teo aloha ihany koa ny fisian’ny tsy fandriam-pahalemana izay mahazo vahana amin’izao fotoana izao. Aoka hoy izy tsy tonga dia handripaka ny mpiarabelona amintsika satria fomba tsy mendrika ny mahaolombelona izany ka tokony alaina ambony sy alaina ambany ny hetsika atao satria saropady ny aina. Fantatro, hoy ihany izy, fa ao anatin’ny fahasahiranana ny vahoaka malagasy satria ny 85 isanjatony vola tokony hiditra eto amin’ny firenena no tsy niditra noho ny sazy mihantra amintsika; koa atsy mahagaga raha mifampihinana ny samy malagasy.
Marihana fa nandefa fiaraha-miory ho an’ny fianankavian-dRajoelina izay namoy hanava ihany koa ny filoha Ravalomanana. Nambarany fa ny hevitra no tsy mitovy, ary tsy miady amam-paty ny tenany.