Tsy nanatrika ny GEL

25/03/2013

Nanaitra ny maro ny tsy nahitana ny an-kamaroan’ireo mpikambana vao voafidy tao amin’ny Antenimieran’ny Varotra Toamasina tamin’ny lanonana fanomezana mariboninahitra ny mpiasa tao amin’ity rafitra ity ny zoma teo. Isan’ny tsy tazana tamin’izany lanonana izany ireo avy amin’ny kolejin’ny Varotra nivoaka avy amin’ny Vondron’ny mpandraharaha mpanondrana letchis na ny GEL, tarihan’ny filohany Rafidimanana Narison. Ny angom-baovao no nahafantarana fa nisy fivoriana tampoka ary fivoriana tsy azo nodinganina ireo mpikambana tao amin’ny GEL tamin’io fotoana io ka izany no tsy nahatongavan’izy ireo niatrika ity lanonana tamin’ny zoma ity.

Na izany na tsy izany nampametram-panontaniana ny maro ny tsy fahitana azy ireo tamin’ity lanonana ity. Nisy mihintsy ny nilaza fa “ho sarotra ny fiaraha-miasa raha izao no ataon’ireto mambra vaovao ny Antenimieran’ny Varotra vao voafidy ireto aminay. I Rafidimanana Narson ho filohan’ny Antenimieran’ny varotra no manadino anay amin’izao mba fankasitrahana anay izao sahady, koa inona no azo antenaina aminy eo raha izany fa tsy ny nataon’ny teo aloha ihany no hiverina eto aminay”.

Tsara ny mampatsiahy fa sambany no nisy fety nankasitrahana ny mpiasa teo anivon’ny Antenimieran’ny varotra (CCI) Toamasina tamin’ny alalan’ny fanolorana mari-boninahitra ireo mpiasa. Ny minisitry ny Varotra Olga Ramalason sy ireo “comite ad’hoc” tarihan-dRajaonah Joseph Mbola no nitarika ny lanonana. Nisongadina nandritra an’io lanonana io ny fankasitrahana sy fanomezam-boninahitra ireo mpiasa miisa 39 nahavita be ireo, izay nisy ihany koa ny mpiasa miisa 08 handeha hisotro ronono ny faran’ny volana marsa izao. Ireo mpiasa izay niezaka nanodina sy namelona ny CCI Toamasina tao anatin’ny fotoan-tsarotra sy nanahirana ary efa tsy nandraisana karama sy ireo tombontsoa manokana azy ireo mihintsy.

Ho hita eo ny tohin’ny raharaha, satria miandry ny mpiasa, ny 03 aprily izao koa no hanao ny fivoriam-beny voalohany ireo mambra 25 mianadahy.