Norahonan’ny miaramila ny mpanao gazety

26/03/2013

Ny mpanao gazety indray amin’izao fotoana izao no henjehin’ilay Kolonely lehiben’ny toby miaramila 1/RM3. Ny mpanao gazety izay tondroiny ho nanaparitaka ny raharaha fototry ny disadisa goavana misy ao amin’ny toby izay tantanany ami ‘izao fotoana izao. Nanome baiko ireo miaramilany ity manamboninahitra ity mba “hanenjika ny mpanao gazety raha misy mahita azt ireo manakaiky ny manodidina ny toby 1/RM3”. Nandritra ny fampitam-baovaon’ny samy miaramila izay fanao isa-maraina no nanambarany izany.

Nivadika ho fandrahonana ireo mpanao gazety indray amin’izao fotoana izao ny disadisa misy ao an’ivon’ny toby miaramila 1/RM3 any Toamasina. Araka ny fantatra dia mpanao gazety roa samy monina manodidina ny 1/RM3 no niantefan’izany fandrahonana izany. Tsy iza ireo fa ny mpanao gazety vehivevy iray izay miasa ao amin’ny TVM/RNM any Toamasina ary monina ao Salazamay kianjan’ny paositra. Torak’izany koa ny mpanao gazety masoivohon’ny gaezty “Taratra” any Toamasina izay monina ao Analakininina Hopitaly be. Voatonona ihany koa ireo solon-tenan’ireo mpanao gazety an-tsoratra rehetra namoaka ny vaovao mahakasika ilay raharaha famoahana basy nampiasain’ny mpanao fakana an-keriny tany Toamasina. Teo am-panaovana ny “rensemblement” vao maraina no namakian’ilay kolonely Tombovelo, lehiben’ny toby 1/RM3 io fandrahonana sy fanenjehana ny mpanao gazety io, ary nanafarany hatrany ireo miaramila an-daharana izay eo ambany fahefany ny hanenjika ny mpanao gazety raha misy mahita manakaiky na manodidina ny toby 1/RM3.
Marihina fa mahakasika ilay “tract” sy “tsiambaratelo” nivoaka teo anivon’ny 1/RM3, mikasika ny fivoahana basy isan’ny nanaovana ilay fakana an-keriny zanaka sinoa mpifankatia ny 26 janoary teo no anton’ity fandrahonana ity. Raharaha izay nivadika ho ady teo amin’ny samy kolonely, ny kolonely sy ny jeneraly, ireo ekipan’ny jeneraly sy ireo manamboninahitra sy ireo manamboninahitra lefitra, ary tonga hatramin’ny fandrahonana mpanao gazety izay tsy nanao afa-tsy ny asa maha mpitatitra ny vaovao azy ny zava-misy ankehitriny.

Mifandrafy

Araka ny angom-baovao hatrany teo anivon’ny toby RM3 anefa, dia tena lasa olana goavana eo amin’ny samy manamboninahitra ambony sy ireo manamboninahitra lefitra ity raharaha ity amin’izao fotoana izao. Ho an’ny voalohany dia ny fikasian-tanana nataon’ilay kolonely lehiben’ny toby RM3 tamina kolonely mpiara-miasa aminy sy fanasoketana azy ho mpamoaka tsiambaratelo no ipetrahan’ny olana. Ho an’ny faharoa kosa ny naman’izy ireo miandry fitsarana am-ponja tsy nisy mpiaro nefa naka vola taminy ihany ilay kolonely lehiben’ny toby tao anatin’ny raharaha “kidnapping” hanejehana azy eo anivon’ny fitsarana, no ipetrahan’ny olana. Mila mandray fepetra henjena arak’izany ny lehiben’ny Tafika malagasy, raha tsy izany ho “lasa ady mivantana ny samy mitam-basy” ny raharaha”, sy ho lasa “lasibatra” koa ny mpanao gazety izay nanao ny asany.