Jiolahy mirongo MAB sy bala '' 74 sy 76 SFI 9 mm''

28/03/2013

Saika tsy navelan’ny vahoaka raha tsy tapitra ny ain’ny iray tamin’ireo jiolahy nanafika tokatrano iray tany Morarano Toamasina, omaly. Nahatratrarana basy PA mitondra ny famantarana MAB sy bala sokajy 74 sy 76 SF I 9 mm ity jiolahy tratran’ny fitsaràm-bahoaka ity. Fitaovam-piadiana mitovy karazana tamin’ireo tratra nandritra ilay fakana an-keriny sy nahatonga ny disadisa teo anivon’ny toby 1/RM3 any Toamasina ireto hita tany amin’ity jiolahy ity ireo.

Miha mahazo vahana hatrany ny ahiahin’ny vahoaka ny amin’ny mety ho fisian’ny mpitandro filaminana mamatsy fitaovam-piadiana ireo jiolahy amin’ireny fanafihana mitam-piadiana ireny. Ny zava-nitranga tany Toamasina omaly no manamafy izany. Jiolahy roa mpamaky trano indray no tratry ny fitsaram-bahoaka tamin’io omaly io tokony tamin’ny 03 ora maraina tao Morarano Toamasina. Araka ny vaovao norantovina teo anivon’ny polisy, dia namaky tranon’ity fianakaviana monina ao Morarano ity izy ireo. Nahare ny fanafihana ilay raim-pianakaviana ka avy hatrany dia nivonona tamin’ny fiarovan-tenany. Vao voavahan’ireto jiolahy ny varavarana dia ilay raim-pianakaviana no nifanehatra taminy. Avy hatrany dia nifitra tamin’ny basy PA “MAB” teny an-tanany ilay jiolahy, saingy tsy nipoaka ny basiny fa nikatso ny bala. Avy hatrany dia nidaroka kosa ilay raim-pianankaviana no sady niantso vonjy. Ilay jiolahy faharoa kosa afa-nitsoaka.
Nisy bala miisa 04 tao anatin’ilay PA, ka ny iray nihitsoka ao anatin’ilay basy, ny 02 kosa “74 SF I 9mm sy 76 SF I 9mm” ary ny bala fahatelo “SB 9mm Br C”. Ireo bala roa voalohany dia efa fahitana hatrany tamin’ireo fanafihana mitam-piadiana tao Toamasina sy hita nandritra ireo fakana an-keriny, izay nahazo vahana tao anatin’ny krizy.
Vao nahare ny antso vonjy ny manodidina dia taitra ary nanao ny fitsaram-bahoaka izay namparatra mafy ilay jiolahy; ilay faharoa kosa na nitsoaka aza tratran’ny fokonolona teo amin’ny “04 chemins” Morarano, ka avy hatrany dia ny ainy no nanefa noho ny hatezeram-bahoaka.

Ny tanany mondry no nahafantarana azy


Ankoatra ity fahatratrarana jiolahy nikasa hamaky trano ity dia isan’ny nanaitra tao Toamasina ihany koa ny fahatratrarana an’ireo jiolahy 02 nangalatra kaontenera nisy vary misanda Ar.1.500 tapitrisa tany Antalaha ny alarobia teo. Efa voasambotra tao Sambava ny naman’izy ireo ary efa miandry fitsarana azy ireo any am-ponja amin’izao fotoana izao. Ireto roalahy ireto kosa, nitsoaka tao Mahajanga avy nankany Toamasina dia izao tratra izao. Ny ankihiben-tanany izay misy bory no nahafantarana azy, araka ny fampitam-baovao avy any Sambava, ka noraisim-potsiny. Efa nalefa any Sambava omaly izy roa lahy.