Mifampiandry ny Zandary sy ny fagnomba

28/03/2013

Tsy sahy mandeha intsony amin’izao fotoana izao ny mpikambana ao amin’ny Fagnomba. Tsy sahy mandeha irery toy izany ihany koa ny zandary. Nisongadina izany nandritra ny valan-dresaka ho an’ny mpanao gazety izay nataon’ny fikambanana Fagnomba tany Tolagnaro. Nokianin’ity fikambanana ity nandritra io fotoana io ihany koa ny fisian’ny fikasan-dratsy handoto ny filohan’ny fikambanana sy ny fikasana hamono azy mihintsy.

Mbola tsy milamina ny toe-draharaha aoTolagnaro ao. Hita taratra izany nandritra ny fanambarana an-gazety tamin’ny alalan’ny valan-dresaka nataon’ny fikambanana Fagnomba tao an-drenivohitry ny faritra Anôsy, omaly. Nandritra io valan-dresaka io no nitondran’ny filohan’ity fikambanana ity fanazavana mahakasika ny fivoaran’ny toe-draharaha taorian’ny nisamborana ny filohan’izany fikambanana izany. Araka ny fanazavan’i Sedera Joel dia mikaro-kevitra handotoana ny filohan’ny Fagnomba amin’izao fotoana izao ireo izay manenjika azy. Misy amin’ity ireo ihany koa ny mikaroka ny fomba mety hanilihana araka izay azo atao an’izany mpitarika ny hetsika fanoherana any Tolagnaro izany. Etsy an-danin’izany, fantatra ihany koa fa mifanmpiandry ny zandary sy ny mpikambana ao amin’ny hetsika Fagnomna any Tolagnaro any amin’izao fotoana izao, araka ny fanambaran’ny filohan’izany fikambanana izany ihany. Nambarany fa samy tsy sahy mandeha ireny na ny an-daniny na ny an-kilany noho ny fatahorana manoloana ny disadisan’izy ireo. Atahorana hivadika korontana ara-piaraha-monina, arak’izany ity raharaha ity, araka ny nambaran’ity filoha lefitry ny Fagnomba ity ihany.
Notsiahivin’ny filohan’ny fikambanana ihany koa ireo antony nahatonga ny hetsik’izy ireo. Lafin-javatra telo no nitondrany fanazavana tamin’izany dia ny momna ny hetsika tao amin’ny 4 chemins na ny sampanan-dalana ao Bezavona, lalana mankany Mandena, toerana misy ny toeram-piasan’ny fasimainty, ny filaharana tao an-drenivohitra Anôsy, hoamin’ny fitakiana ny fialan’ny lehiben’ny faritra Anôsy tamin’ny toerany, ary ny fahavakisan’ny tranoben’ny CED/CENI-T any Faradofay. Fitakiana ny tombotsoan’ny mponina amin’ny tsy ara-dàlana ataon’ny orin’asa fasimamnty no anisan’ny anaovan’izy ireo ny tolona ary na misy aza ny fanelengelenana dia hiady hatramin’ny farany hoamin’ny tombotsoan’ny vahoaka izy ireo araka ny nambarany. Nitaky ny fialan’ny lehiben’ny faritra kosa ry zareo tetsy an-danin’izany satria tsy nandeha araka ny tokon y ho izy ny fandaminana ny disadisam-piaraha-monina nateraky ny tsy rariny ataon’ny orinasa fasimainty.
Ary farany dia nitondrany fanazavana ihany koa ny mikasika ny favakisan’ny tranon’ny CENIT ka nanaovana hazalambo ireo mpikambana maro tarihin’ny filohany Zafinandro Perle Fourquet. Ity farany izay mbola any am-ponja hatramin’izao ary mbola nalaina am-bavany tamin’ny alarobia teo rehefa nolavin’ny fitsarana ny fangatahana fahafahana vonjimaika ho azy. Nilaza ny filoha lefitry ny Fagnomba fa tsy manana tombotsoa amin’ny fahavakisan’ny tranoben’ny CENI-T ny mpikambana ao aminy. Mahagaga ary mamapametram-panontaniana ihany hoy izy fa antoandro be nanahary, any amin’ny 7ora na amin’ny 8ora maraina no vaky ny trano. Misy mpitandron’ny filaminana eo akaikin’ny trano: Tobi- miaramila sy ny biraon’ny pôlisy. Akoatr’izay dia nanamafy ny fanakianany ny nanaovan’ireo zandary herisetra tamin’ireo mpikambana ao amin’ny fikambanana fagnomba ihany koa ny filoha lefitr’ity fikambanana ity.