Gadra politika ny vahoaka

02/04/2013

Resy lahatra ny amin’ny tsy fahombiazan’izao fitondrana HAT izao avokoa ny olom-pirenena tsy an-kanavaka. Isan’ireo fikambanana manameloka izao rafitra nitondra ny firenena nandritra ny efatra taona izao ny Green Gasikara avy amin’ny vondrona Zafy Albert faritra Fianarantsoa, araka ny tafa niarahana tamin’i Fidison. « Ny vahoaka Malagasy 20 tapitrisa mihitsy izao no efa gadra politika, ankoatra ireo mpanao politika sy manamboninahitra mbola migadra noho ny krizy teto amin’ny firenena », hoy i Fidison. Nasiany tsindrim-peo tamin’izany ny tsy fisian’ny mangarahara amin’ny fitantanan-draharaham-panjakana sy ny volam-panjakana. Nangatahan’ity solontenan’ny Green Gasikara ity araka izany ny tokony hisian’ny fanazavana matotra ny amin’ny orinasa nahazo ny tolo-barotra hanafatra ireo fiara fitaterana (bus) vita Sinoa.

Tsy ny fihazakazahana amin’ny fifidianana filoham-pirenena no maha maika, hoy hatrany Fidison, fa ny fifidianana izay lalam-panorenan’ny repoblika faha-efatra. Nomarihany mantsy fa lalam-panorenana tsy nahazo ny fankatoavan’izao tontolo izao ny tamin’ny faha-17 novambra 2010. Tsy vitan’izany fa tsy misy mahalala izay voarafitra ao anatin’izany lalam-panorenana tefy maika izany ny ankamaroan’ny vahoaka Malagasy. Tokony hapetraka aloha ny fampihavanam-pirenena, araka ny hevitr’ity mpanao politika ity. Ho azy ireo dia tsy misy afatsy ny profesora Zafy Albert irery ihany no afaka hitarika izany noho ity filoha teo aloha ity efa niady ho amin’izany fampihavanam-pirenena izany hatramin’ny ela.
Nomarihany ihany koa fa tsy mila ny filohan’ny HAT, Andry Rajoelina intsony ny vahoaka Malagasy. Tsy araka ny fampanantenana teny amin’ny kianjan’ny 13 may ny zava-misy iainan’ny olona amin’izao fotoana ary tsy afaka ny hiantoka ny ain’ny olona sy ny fananany intsony koa izao rafitra Tetezamita izao noho ny firongatry ny tsy fandriampahalemana an-tanan-dehibe sy ambanivohitra. « Tsy mbola nisy tsy fandriampahalemana tahaka izao teto Madagasikara hatramin’izay 52 taona nahazoana ny Fahaleovantena izay », hoy hatrany Fidison. Ny fanontaniana mipetraka eo anatrehan’izao raharaha izao dia ny hoe : iza no heverin’ny Green Gasikara fa hitantana ny firenena sy hanomana ny fifidianana rehetra hifandimby ?