Mbola betsaka ireo tsy maty manota

02/04/2013

Efa azo vinavinaina sahady ny tatitra mety hataon’ny mpitandro filaminana taorian’ny fetin’ny pasaka. Tsy inona izany fa ny fanambarana fa tafita ny tanjona napetraka dia ny « paska ieren-doza ». Sanatria tsy hanao fanakianana mikasika izay fenitra avo lenta izay “La Nation” androany. Tsara sady mendri-dera tokoa ny fametrahana fanamby avo toy izany.

Saingy ny hisintonana ny saina dia ny maha izy azy ireny fanamby ireny. Raha ny zava-misy eto amin’ny firenena amin’izao fotoana izao no resahana, dia tsy mahamenatra ny maro amin’izao fotoana izao ny mivadika amin’ny fanamby napetrany.
Loha-laharana amin’ny fivadiham-pitokisana ny mpanao politika, indrindra ireo nahazo fahefanana sy fitondrana ary ireo any anatin’ny andrim-panjakana samihafa any. Fanovàna ny fomba fitantanana ny tany sy ny fanjakana no nampanantenain’izao tetezamita izao. Tsy izany anefa no zava-misy amin’izao fotoana izao fa ny omaly tsy miova ihany no fomba fiasan’ny fitondrana. Fanatsarana ny fiainam-bahoaka no nentina nandresy lahatra ireo izay nametraka izao fitondrana izao kanefa tsy fiovana nankany amin’ny nandrandrain’ny maro fa nankany amin’ny fitontonganan’ny fiainam-bahoaka.
Ny tian-kambara dia izao: mananontanona ny fanatanterahana ny fifidianana eto Madagasikara na dia maro aza ireo tsy mino ny hahatongavana amin’izany. Ny fifidianana izay vanim-potoana mampalaza ny ronono an-tavy sy ny fampanantenana isan-karàzany. Efa misy izany amin’izao fotoana izao, saingy mahagaga fa toy ny efa ara-dàlana izany rehefa ny olona eo amin’ny fitondrana no manao azy. Sahy miantsy ireo mpanakiana azy amin’ny filazana midika fanitsakitsahana ny làlana manankery mihitsy aza ireto farany amin’ny fanambarana fa “propagandy avokoa no atao rehefa manao politika”.
Raha izany no izy dia azo antoka fa ho vola very maina ny hatobaka amin’ity fikarakarana ny fifidianana ho avy eto amin’ny firenena ity. Eny fa na dia ny mpitandro filaminana izay mpiaro ny vahoaka aza. Izireo no antenain’ny maro handray fanampahan-kevitra manoloana ny fihoaram-pefy toy izao hita mibaribary izao. Raha tsy izany dia tsy ho resy na oviana na oviana ny tsy maty manonta.