Hisy fanangana tetezamita vaovao ?

02/04/2013

Araka ny fanambarana nataony nandritra ny vavaka iraisam-pinoana ho fanamarihana ny tsingerin-taonan’ny tolom-panafahana 1947 dia hamory ireo vondrona sy antoko politika misy eto amin’ny firenena ny FFKM amin’ny 18 avrily ho avy izao. Dinika savaranonando, tafiditra amin’ny fampihavanam-pirenena tarihan’ny FFKM no ho votoatin’izany fihaonana izany. Hiroso amin’ny fampihavanam-pirenena arak’izany ny FFKM na dia efa tafatsangana aza ny FFM izay rafitry ny tetezamita natao hiantsoroka izany andraikitra izany. Antony ilazan’ny mpanara-baovao maro fa mety hiafara amin’ny fananganana rafitra vaovao hasolo izao tetezamita izao ity fampihaonana hataon’ny FFKM ity.

Efa ela no niandrasan’ny be sy ny maro ny fiverenan’ny FFKM eo amin’ny fanelanelanana ireo mpifanandrina mba hamerenana amin’ny laoniny ny fiainam-pirenena eto Madagasikara sy ho famaranana tanteraka an’izao krizy izao. Fantatra ary nandritra ny fotoam-pivavahana tafiditra tamin’ny fanamarihana ny tsingerin-taonan’ny tolom-panafahana 1947 fa hiroso amin’izany asa izany ny FFKM. Amin’ny faha 18 avrily ho avy io no hamory ireo hery velona rehetra eto amin’ny firenena ny filankevitry ny Fiangonana kristianina eto Madagasikara mba afahana mamariparitra miaraka ny dingan’ny fampihavanana izay kasainy hatao eto amin’ny firenena. Tsara ny mampatsiahy fa tsy vao izao akory no naneho ny fahavononany hanao izany fampihavanana ireo mpifanandrina ara-politika eto amin’ny firenena ny FFKM. Manamafy izany ny fanampahan-kevitra izay noraisin’ny fivoriam-be faha 35 tamin’ny volana Novambra tamin’ny taon-dasa izay efa namaritra ny hanatontosana ity dinika savaranonando ity. Saingy izao izany vao ho tanteraka ity dingana ity.
Tsy isalasalana ny milaza fa nampametram-panontaniana ny maro izao fandraisana fanampahan-kevitra nataon’ny FFKM izao, indrindra noho ny fahitana fa efa niroso tamin’ny fametrahana ny FFM izay rafitra voatondron’ny tondrozotra hiandraikitra izany asa fampihavanam-pirenena izany. Midika ve izany fa tsy mankato na tsy manantena ny fahombiazan’ny asan’ny FFM ny FFKM?
Etsy an-danin’izany, mbola ametrahan’ny maro fanontaniana ihany koa ny ho lanjan’izay fanampahan-kevitra tapaka mandritra ity fampihavanana hataon’ny FFKM ity. Iaraha-mahalala fa fandraisana andraikitra ivelan’ny voalazan’ny tondrozotra izao ataon’ny FFKM izao. Azo heverina arak’izany fa mety hiafara amin’ny fananganana rafitra vaovao eto amin’ny firenena ity fampihaonana vaovao ity. Raha atao amin’ny teny hafa dia mety hiafara amin’ny fampijanonana amin’ny asany izao fitondrana tetezamita izao izany fampihavanan’ny FFKM izany. Iaraha-mahalala rahateo fa efa efa tsy mandeha araka ny tokony ho izy intsony ny fiaraha-mitantana fototr’izao tetezamita izao, eny fa na dia eo amin’ireo samy mpomba ny fanonganam-panjakana nisy teto Madagasikara aza dia efa samy tsy mitovy fomba fijery intsony.
Tsy hahazo fankatoavana
Tsara ny mampatsiahy fa araka ny fantatra dia efa nisy ny fandraisana ny hevitry ny antoko na vodrona politika sy firaisamonim-pirenena izay nataon’ny FFKM nandritra ny volana maro, talohan’ny fahatongavana amin’izao dingana izao. Na izany na tsy izany tsy vitsy ireo milaza sahady fa ho sarotra ho an’ny FFKM ny hanatanteraka ity fampihaonana ity. Mety tsy hankato izany, hoy ny filazan’ny maro, ireo mpitondra tetezamita amin’izao fotoana izao noho ny fahafantaran’izy ireo fa hanala azy ireo eo amin’ny fitondrana ny tany sy ny fanjakana ny fisian’izany fampihavanana hataon’ny FFKM izany. Manana fialana rahateo izy ireo satria ny rafitry ny FFM no efa nifanarahana fa hiantsoroka ny fampihavanam-pirenena hivoahana amin’ny krizy. Ary tsy tokony hadino fa isan’ny rafitra nasaina hiditra ao anatin’ny FFM ny FFKM saingy tsy nanaiky. Ho sarotra amin’ity farany arak’izany ny hahazo ny fitokisan’ny mpanao politika miara-dàlana amin’izao fitondrana izao.