Mpanam-bola iray no ahian’ny mponina ho ati-doha

02/04/2013

Mitaraina ny mponina any amin’iny faritry Maroantsetra iny ankehitriny noho ny firongatry ny halatra taolam-paty. Miahiahy olona mpanam-bola be ao an-toerana ho fototr’izany ny ankamaroan’ny mponina. Voalaza mantsy fa ity mpanankarena antsoina hoe A... ity no tena mpandrindra ny fomba fangalarana taolam-paty ao amin’ireo kaominina manodidina akaiky an’I Maroantsetra.

Tsy afa-manoatra ny mponina na dia efa mahafantatra aza fa ity mpanam-bola be antsoina hoe A… ity no tena ao ambadiky ny halatra taolam-paty any amin’ny distrikan’I Maroantsetra sy ny manodidina. Voalazan’ny loharanom-baovao tokoa fa toa hoe misy mihitsy ben’ny tanàna miray tsikombakomba amin’A… ao amin’ny distrikan’I Maroantsetra ka mahatonga izay mety ho famakiana bantsilana izany fomba ratsy izany tsy ho tafita. Marihina fa matetika tokoa no misy izany vaky fasana izany, indrindra tao anatin’ny iray volana izay. Izay rehetra manolo-tena hametraka fitoriana an’ny amin’ny manampahefana anefa dia iharan’ny fandrahonana. Araka ny fitantaran’ny mponina sasany izay efa mahatsapa ny tsy rariny amin’izao sehon-javatra izao, dia tsotra nefa mahaomby amin’ny asaratsiny ny fomba ataon’ity olona antsoina hoe A... ity mba handrebirebena ny mponina : mody mikarakara lanonana (fandihizana, fety, rindrankira,…) any amin’ny toerana iray I A… sy ireo namany, ka rehefa vory lanona any ny vahoaka, dia avy ireo tsivalahara, manararaotra mamaky ireo fasana sy maka ny taolam-paty ao. Tsy vitsy araka izay ireo mponina no namohy tanteraka ny havany, eny hatramin’ny taolambalony aza.
Ny resaka nataon’ny olona avy Maroatsetra taminay koa ny nahafantarana fa misy teratany sinoa efa mpandray ny “entana”. Tsy ela akory fa vao tamin’ny alatsinainy 25 marsa lasa teo dia tsikaritr’ireo olona avy any Maroatsetra sedra mandalo eto An-drenivohitra, miaraka amin’ireo havany monina eto, fa nisy fihaonan’I A... sy ireo manampahefana vitsivitsy avy any amin’ny distrikan’I Maroantsetra, tao amina trano fandraisam-bahiny iray teny Ankorondrano, miaraka amina teratany sinoa.