“Ireo minisitra mpisolelaka no sakana”

02/04/2013

Tondroin’ireo mpandala ny fametrahana ny rafitra federaly eto Madagasikara ho sakana amin’ny fanatanterahana fitsapan-kevi-bahoaka mialoha ny fifidianana hafa hatao eto amin’ny firenena ny mpikambana sasany avy any anindran-tany ao amin’ny Governemanta. Mbola hitohy anefa ny fifandresen-dahatra eo an’ivon’izany andrim-panjakana izany araka ny nambaran’ny minisitra Tabera Randriamanantsoa, izay nitarika ny fahatsiarovana ny datin’ny 31 marsa nahafatesan’ireo mptolona federaliste tamin’ny taona 1991. “Ho antsika malagasy jiaby ny fametrahana ny rafitra federaly eto amin’ny firenena…Tsy misy rafitra hamaha olan’ny fampandrosoana eto afa-tsy ny fametrahana io rafitra federaly io ihany.

. Isika tanindrana mihintsy anefa no tena sakana amin’ity rafitra federaly ity, fa tsy ny ao Antananarivo izany mihintsy ka aza diso hevitra isika vahoaka sao misy hamahan-dalitra eo indray”. Izay no nambaran’ny minisitry ny Asa sy ny Asam-panjakana Tabera Randriamanantsoa, nandritra ny fanamarihan’ny mpandala ny foto-kevitra federalism tany Toamasina, omaly. Ankoatra izay dia nahitsy ireo mpandala ny rafitra federaly ihany koa ny tenany ka nanamafy fa ny zanaky ny faritra “mpisolelaka” ihany no tena olana amin’ny fametrahana ity rafitra ity. Raha miisa 35 izahay minisitra amin’ny governemanta izao, hoy ny fanambarany dia ny 80% dia zanaky ny faritra avokoa, kanefa izy ireo mihintsy no sakana amin’ny fangatahana ny hanaovana fitsapan-kevi-bahoaka mialohan’ny fifidianana rehetra, ka nametrahana ny rafitra federaly ho isany hisafidianan’ny vahoaka. Nambarany ihany koa fa ny 09 aprily izao ny tohin’ny dinika momba izany eo anivon’ny filan-kevitry ny governemanta.

Nanatitra fehezam-bonikazo

Marihina fa tsy navelan’ireo mpandala ny foto-kevitra federalisma nandalo fotsiny ny datin’ny 31 marsa izay namoizan’ny naman’izy ireo ny ainy nandritra ny hetsika tamin’ny taona 1991 izay nitakian’izy ireo ny fametrahana ny faritra “federaly”. Isan’ireo fito maty noho ny tifitra nahazo azy ireo tamin’izany, raha ny voasoratra eo amin’ny tsangam-bato fahatsiarovana, i Laha Gaston, Rakotomandimby, Rajaomaria, Bezanajafy, Samson, Marius ary Ludovic Rene. Nisy ny fametrahana fehezam-bonikazo nataon’ireo federalista tao Toamasina notarihan’ny Minisitry ny Asam-panjakana Tabera Randriamiarantsoa, ny mpanolontsaina avon’ny tetezamita Henry Lecacheur sy Vaovao Benjamin ary ireo mpitolona am-polony tonga niatrika ny lanonana.
Ny CST Vaovao Benjamin kosa dia nanoritra ny tantara nahatonga ny fitakiana, izay niandoha ny 10 mai 1991 tany Vohemar izay nitakiana tamin’ny fitondrana Ratsiraka ny hametrahana izany araka ny voarakitry ny “boky mena” sy ny fitsipahana ilay didim-panjakana 73-014 sy 73-015 navoakan’ny fitondrana Ramanantsoa namerina ny “centralisme” amin’ny fitantanan-draharaham-panjakana.. “Tsy fampizarazana ny Malagasy na i Madagasikara ny fametrahana ny faritra federaly fa vao maika miantoka ny firaisam-pirenena izany satria samy tompo-marika amin’ny fampondrosoana ny vahoaka Malagasy manerana ny nosy”, hoy kosa ny filohan’ny PMF vondrona politika mivoy ny rafitra federaly CST Henry Lecacheur, nandritra ny fandraisany fitenenana.