Nosoloina ny jeneraly Rasamoelina

02/04/2013

Araka ny fanampahan-kevitry ny filan-kevitry ny minisitra ny alarobia 27 mars lasa teo dia nesorina tamin’ny toerany ny komandin’ny faritany miaramila faha telo na ny RM3 Toamasina ny Jeneraly Rasamoelina. Ny kolonely Rabemonina Julien no handray izany toerana izany manomboka izao.

Samy nampifandray an’izao fanampahan-kevitry ny filankevitry ny minisitra izao amin’ny disadisa misy any amin’izany tobymiaramila izany ny mpanara-baovao. Tsy vitsy ny mahita fa mety handamina ny raharaha mampifanolana ny samy manamboninahitra any an-toerana izao fanampahan-kevitra izao. Isan’ny miombon-kevitra amin’izany ireo manamboninahitra izay tafaresaka tamin’ny mpanao gazety tany an-toerana. Ho an’ireto farany dia isan’ny tafiditra lalina tao anatin’ity disadisa teraka taorian’ilay raharaha famoahana an-tsokosoko fitaovam-piadiana tao amin’ity toby ity jeneraly ity izay tondroin’ireo namany ho isan’ny mpomba ilay kolonely voatonontonona amin’izany raharaha izany. Noho izany na tsy izany dia isan’ny tranga mety hiseho, sady andrasana amin’ny komandy vaovaon’ny RM3 ny fanesorana amin’ny toerany an’ilay kolonely izay fototry ny disadisa ao, amin’ity toby izy ary ny fanendrena manamboninahitra hafa amin’ny toerana nosahaniny hatramin’izao. Na izany na tsy izany anefa dia isan’ny tena andrasana indrindra amin’ny komandy vaovaon’ny RM3 Toamasina ny fanaovana ny fanadiadiana hivoahan’ny marina ao anatin’ilay raharaha basy kalaky sy basy poleta, ary hampidirana am-ponja ireo tena tompon’antoka amin’izay, tsy haharatsy ny tafika ao Toamasina. Adidy goavana arak’izany no miandry ity kolonely vaovao ny RM3 ity.

Fanenjehana mpanao gazety

Tsara ny manamarika fa mbola nitohy hatrany ny fandrahonana mpanao gazety nataon’ireo ekipan’ny jeneraly Rasamoelina sy ny kolonely Tombovelo, mikasika ny ambaran’izy ireo fa famoahana ny tsiambaratelon’ny tafika sy ny famoahana ny vaovao momba ny adin’izy mirahalahy ireto tamin’ny kolonely Bonaïde izay nahazoan’ity farany ny rariny tamin’ny fitsarana ny ady amin’ny fanjakana mihazona ny trano fonenany eo anivon’ny toby miaramila RM3. “Ataovy amin’ny fanaovana azy ireo mpanao gazety ireo, ‘chasser’-o hatramin’ny farany ary arahana maso ireo miaramila miresaka amin’izy ireo fa ireny ihany no tena milaza zavatra ato”. Izay no baiko miainga mahazo ny mpanao gazety indrindra izy mianadahy monina manodidina ity toby miaramila ity. Ao anatin’izay anefa dia voarahona hatramin’ny zanaky ny lehiben’ny “DST” ihany koa noho izy mandalo eo anivon’ny toby na mivoaka na miditra ny tranony.