Mihorohoro ireo mpitsara any Ambatondrazaka

03/04/2013

« Na dia manana ny fahaleovan-tenanay tanteraka aza ireo mpitsara manoloana ny raharaha mahavoaroiroy ireo tera-tany Srilankais any Ambatondrazaka dia tsy mahasakana ny tebiteby mianjady amin’izy ireo izany, izay mety hanana fiantraikany amin’ny didy avoakany, manoloana ny fihetsiky ny mpitandro filaminana avy ao amin’ny Zandarmariam-pirenena izay efa mandrangaranga sahady ny tsy ho fankatoavany ny fanampahan-kevitry ny mpitsara raha tsy mifanaraka amin’ny heveny izany ». Izay no nambaran’ny mpitsara iray izay naneho ny heviny manoloana ity raharaha Srilankais any Ambatondrazaka ity.

Mety tsy ho afaka hanao ny asany ao anatin’ny fitoniana arak’izany ireo mpitsara, hoy ihany ny fanazavany, indrindra amin’ny fahitana ireo zandary marobe izay tonga any Ambatondrazaka hatry ny omaly.
Marihina fa amin’ity androany ity no ho tanterahina ny fitsarana ireo teratany Srilankais miisa 10 mbola tazonina any amin’ny fonjan’Ambatondrazaka hatramin’ny nisamborana azy ireo. Fitrandrahana vatosoa tsy ara-dàlana no vesatra iampangana azy ireo. Raha tsiahivina dia nandritra ny hetsika manokana nataon’ny mpitandro filaminana no nahasamborana an’ireto teratany Srilankais ireto. Tsy tany amin’ny faritry ny toeram-pitrandrahana ny safira any Didy akory no nahasamborana ny maro tamin’izy ireo fa teny andalam-podiana. Ny sasany aza efa tany amin’ny seranam-piaramanidina iraisam-pirenena Ivato no nosamborina. Tetsy an-danin’izany dia nisy Malagasy miisa 10 ihany koa nosamborina tao anatin’izany hetsika izany. Efa nisy ny fanadihadiana savaranonando nataon’ny fitsarana tany Ambatondrazaka talohan’ny nampidirana am-ponja an’ireo izay voaroiroy tamin’ity raharaha ity. Taorian’izany fanadihadiana izany dia nafahana noho ny fisalasalana ireo teratany Malagasy miisa folo. Nisy teratany Srilankais ihany koa nafahana tamin’io fanadihadiana io. Tsy nahafaly ny mpitanbdro filaminana avy tao amin’ny Zandarmariam-pirenena izany fanampahan-kevitry ny fitsarana izany. Isan’izany, mazava loatra ny Sekreteram-panjakana miadidy ny Zandarmariam-pirenena, ny Jeneraly Randrianazary izay nilaza mazava fa hitam-poko hitam-pirenena ny asa-ratsy nataon’ireo olona ireo (ireo Srilankais). Noho izany hampakatra amin’ny fitsarana ambony ny Zandary sy ny ministeran’ny harena ankobon’ny tany ary ny Faritra Alaotra Mangoro raha tsy mifanaraka amin’ny tokony ho izy ny didy avoakan’ny fitsarana any Ambatondrazaka. Nomarihany kosa anefa fa “tsy midika ho ady eo amin’ny zandary sy ny fitsarana izao raharaha izao”.