Notafihana andian-jiolahy mirongo basy

03/04/2013

Lasan’ireo mpanafika ny vola rehetra tao amin’ny fitahirizam-bola sy ny ampaham-panafody tao amin’ny trano fivarotam-panafody ao anivon’ny Hôpitaly Joseph Raseta etsy Befelatanana. Jiolahy miisa fito mitongo fitaovam-piadiana ary samy tsy misaro-tava no nanafika tao amin’ity toeram-pitsaboana isan’ny goavana indrindra eto Madagasikara ity, ny marainan’ny talata tokony ho tamin’ny 2 ora sy sasany. Mandry an-driran’antsy hatramin’ny marary noho ny afitsoky ny jiolahy izay mirongatra tsy mbola misy toy izany amin’izao fotoana izao eto amintsika.

Raha toerana tsy noeritreretina ho isan’ny lasibatry ny asa-ratsin’ireo jiolahy ny trano fitsaboana hatramin’izay dia tsy izany intsony izy amin’izao fotoana izao, indrindra taorian’ny fanafihana izay nitranga omaly tao amin’ny Hôpitaly Joseph Raseta etsy Befelatanana. Araka ny loharanom-baovao teny an-toerana dia ny trano fivarotam-panafody no lasibatr’ireo olon-dratsy omaly maraimbe, tokony ho tamin’ny roa ora sy sasany. Nirongo fiadiana toy ny basy poleta miisa roa sy antsy maranitra ireo mpanafika, araka ny filazan’ireo mpiasa nanatri-maso izany asa-ratsy izany. Tsy nisaro-tava ireto miisa fito nanafika ny hôpitaly Befelatanana ireo, ary tsy fantatra hatramin’izao ny fomba nidiran’izy ireo tao anatin’izany trano fitsaboana izany.
Tsara ny manamarika fa vola mitentina 2 500 000 ariary izay tao amin’ny toerana fitahirizam-bolan’ny trano fivarotam-panafody tao an-toerana, miampy fanafody maromaro no lasan’izy ireo nandritra ity fanafihana ity. Nofatoran’izy ireo avokoa ny mpiasa tratrany tao amin’ny fivarotam-panafody talohan’ny nanaovany ny asa-ratsiny.
Tsy fahita hatrizay
Sambany hatramin’izay naha Befelatanana an’i Befelatanana no nisy izao tranga izao, hoy ny tompon’andraikitra sendra ny mpanao gazetin’ny La Nation izay tonga teny an-toerana omaly tolak’andro. Niaiky arak’izany ity tompon’nandrikitra ity fa efa tena mihoatra ny azo eritreretina mihintsy amin’izao fotoana izao ity resaka tsy fandriam-pahalemana ity. Niaiky ihany koa ny tenany fa tsy voafehin’ny mpitondra eo anivon’ny fitandroana ny filaminana eto amintsika ny fiarovana ny aina sy ny fananan’ny mponina ka tokony handinika lalina ny isan’isany avy manoloana izany. Marihina fa omaly ihany dia efa nohenoina teny amin’ny fitsarana ireo mpiasa izay niasa tamin’io fotoana io tao amin’ny trano fivarotam-panafody tao amin’ny hôpitaly Befelatanana. Tsy mahagaga izany satria amin’ny raharaha toy izao dia isan’ny alehan’ny saina matetika ny amin’ny mety fisian’ny tsikombakomba eo amin’ny mpiasa sasantsasany sy ny mpanao ratsy.